រាជធានីភ្នំពេញ៖ ក្រោយពេលកើតមានករណីក្មេងពាល បានកាប់ម៉ូតូរបស់ជនរងគ្រោះ ចំនួន២គ្រឿង នៅមុខផ្សារច្បារអំពៅ រួចមក អាជ្ញាធរខណ្ឌច្បារអំពៅ បានស្រាវជ្រាវ រហូតឈានដល់ការឃាត់ខ្លួនជនសង័្សយចំនួន២នាក់ កាលពីវេលាម៉ោង៨ និង៥០នាទីព្រឹក ថ្ងៃទី១៤ ខែមករា ឆ្នាំ២០២៥ នៅក្នុងភូមិសាស្រ្ដខណ្ឌច្បារអំពៅ រាជធានីភ្នំពេញ។

ប្រភពព័ត៌មាន បានឱ្យដឹង ថា នៅមុនពេលកើតមានអំពើហិង្សានោះ មានយុវជនប្រុសស្រី ចំនួន២នាក់ បានជិះម៉ូតូចំនួនពីរគ្រឿង ហើយក្នុងនោះមួយគ្រឿង ម៉ាកស៊ុយហ្ស៊ុយគីនិច ពណ៌សលាយខៀវ និង មួយគ្រឿងទៀត ម៉ាកហុងដា ស្កូពី ពណ៌ក្រហម បានចេញពីផ្ទះ ទៅរកទិញស្លាបមាន់ នៅមុខផ្សារច្បារអំពៅ។ បន្ទាប់ពីពួកគេបានទិញរួចហើយ ក៏បាននាំគ្នាអង្គុយលេង ស្រាប់តែលេចមុខក្មេងទំនើងមួយក្រុម មានគ្នាប្រហែលជិត១០នាក់ ប្រដាប់ដោយដាវ និង កាំបិត បានជិះម៉ូតូជាច្រើនគ្រឿងមកដល់ ក៏កាប់បំផ្លាញម៉ូតូរបស់ជនរងគ្រោះទាំង២គ្រឿង បណ្តាលឲ្យខូចខាត។ ភ្លាមៗនោះ ក្រុមក្មេងពាលទាំងនោះ បាននាំគ្នាជិះម៉ូតូ គេចខ្លួនបាត់អស់។

ប្រភពពីសមត្ថកិច្ច បានឲ្យដឹង ថា កាលពីវេលាម៉ោង៩ និង ៣០នាទីយប់ ថ្ងៃទី១៣ ខែមករា ឆ្នាំ២០២៥ មានករណីក្មេងទំនើងមួយក្រុម បានកាប់បំផ្លាញម៉ូតូចំនួន២គ្រឿង នៅមុខផ្សារច្បារអំពៅ តាមផ្លូវលេខ៣៦៩ ស្ថិតក្នុងភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។ បន្ទាប់ពីមានករណីក្មេងទំនើងបានដើរបង្កការអុកឡុកបែបនេះភ្លាម គណៈបញ្ជាការឯកភាពរដ្ឋបាលខណ្ឌ និង កម្លាំងអធិការដ្ឋាននគរបាលខណ្ឌច្បារអំពៅ បានចុះស្រាវជ្រាវ រហូតឈានដល់ការឃាត់ខ្លួនជនដៃដល់ម្នាក់ និង បក្ខពួកម្នាក់ទៀត។ ជនសង័្សយទាំងនេះ រួមមាន៖ ១-ជនដៃដល់ ឈ្មោះ ប៉ាវ ស៊ីណា និង បក្ខពួក ឈ្មោះ លន់ វិល្លៀម។

ក្រោយពេលឃាត់ខ្លួនរួចមក សមត្ថកិច្ចបានបញ្ជូនខ្លួនជនសង័្សយទាំង២នាក់ និង វត្ថុតាង ទៅកាន់អធិការដ្ឋាននគរបាលខណ្ឌច្បារអំពៅ ដើម្បីសាកសួរ និង ចាត់ការតាមច្បាប់ ហើយបន្ដតាមចាប់ខ្លួនបក្ខពួករបស់ពួកគេបន្ថែមទៀត៕