សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជួយព្យាបាលជំងឺកង្វះសារធាតុពណ៍ និងបញ្ហាគំហើញភ្នែករបស់ក្មួយស្រីពីរនាក់បងប្អូន រស់នៅក្រុងរុនតាឯក

សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី បានចាត់ក្រុមការងារគ្រូពេទ្យស្ម័គ្រចិត្តរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី នាំក្មួយស្រីចំនួន ២នាក់ ជាបងប្អូនបង្កើត ឈ្មោះ បារាំង ហ្វាងមានមាន អាយុ ៤ ឆ្នាំ និង បារាំង ហ្វាងមីងមីង អាយុ ២ ឆ្នាំ រស់នៅក្រុងរុនតាឯក ខេត្តសៀមរាប មានជំងឺកង្វះសារធាតុពណ៍ (melanin) ពីកំណើត បង្កឱ្យស្បែក​ សក់​ និងភ្នែក ឡើងពណ៍ស ព្រមទាំងមានបញ្ហាគំហើញភ្នែក យកមកទទួលការព្យាបាលនៅមន្ទីរពេទ្យកុមារអង្គរ ក្នុងខេត្តសៀមរាប ក្រោមការសម្របសម្រួលរបស់សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ។

ជំងឺនេះបង្កឱ្យឆាប់រលាក និងប្រឈមបញ្ហាជំងឺស្បែកផ្សេងៗបណ្តាលមកពីកាំរស្មីព្រះអាទិត្យ។

ក្រោយទទួលបានការពិនិត្យលើបញ្ហាស្បែក និងបានវ៉ាស់គំហើញ ក្រុមគ្រូពេទ្យបានណែនាំអំពីវិធានការពារស្បែក និងបានកាត់វ៉ែនតាដើម្បីជួយដល់ការមើលឃើញរបស់ក្មួយទាំង២ ក៏ដូចជាដើម្បីការពារពន្លឺផងដែរ ។

ក្រុមគ្រួសារមានក្តីរីករាយជាពន់ពេក និងគោរពថ្លែងអំណរគុណជូនចំពោះ សម្តេចធិបតី និងលោកជំទាវបណ្ឌិត ជាអនេក ៕