ថៃ ៖ កម្មវិធី Miss Grand International របស់តាណាវាត់ បង្កភាពភ្ញាក់ផ្អើលសារជាថ្មីទៅកាន់អ្នកគាំទ្រវិស័យបវរកញ្ញាទូទាំងពិភពលោកជាមួយនឹងការបែកធ្លាយអាស្រូវដ៏ស្អុយរលួយតាមតាមការចេញមុខមកទម្លាញពីបេក្ខនារីដែលបានប្រកាសដកខ្លួននោះ គឺ Miss Grand Ukraine ។
កញ្ញា Kateryna Bilyk បវរញ្ញាតំណាងប្រទេស Ukraine បានប្រកាសដកខ្លួនពីការប្រកួតដោយសំអាងមូលហេតុដ៏ហួសចិត្តជាច្រើនដោយនាងបានរៀបរាប់លម្អិតនៅក្នុងសេចក្តីថ្លែងការណ៍ផ្លូវការរបស់ខ្លួនយ៉ាងដូច្នេះថា ៖ នាងខ្ញុំ Kateryna Bilyk នាងខ្ញុំមានសេចក្តីសោកស្តាយជាខ្លាំងក្នុងការបង្ខំចិត្តដកខ្លួនចេញពីការប្រកួត Miss Grand International ដោយសារបញ្ហាប្រឈមធ្ងន់ធ្ងរផ្នែកសុខភាពរបស់នាងខ្ញុំ ដែលកើតឡើងដោយសារស្ថានភាពនៃកម្មវិធីប្រកួត ។
ក្នុងរយៈពេលពីរសប្ដាហ៍ នាងខ្ញុំត្រូវបានកំណត់អោយចូលរួមក្នុងសកម្មភាពផ្សេងៗនៃកម្មវិធីចាប់តាំងពីម៉ោង៨ព្រឹករហូតដល់ម៉ោង១១យប់ ឬពាក់កណ្តាលអធ្រាត្រ ក្នុងនោះមាន១ថ្ងៃដែលសកម្មភាពភាពចាប់ផ្តើមតាំងពីម៉ោង៣ទាបភ្លឺរហូតដល់ម៉ោង១១យប់ ។ ទោះបីជានាងខ្ញុំគ្រុនក្តៅ ក្នុងសីតុណ្ហភាពចន្លោះពី ៣៧.៥ទៅ៣៨.២ អង្សាសេ ក្នុងរយៈកាល១១ថ្ងៃចុងក្រោយនេះក៏ដោយចុះ ។ ស្ថានភាពរបស់នាងខ្ញុំ ត្រូវបានកត់ត្រាដោយវេជ្ជបណ្ឌិតឯកជននៅ Pattaya និង ដោយវេជ្ជបណ្ឌិតនៃសណ្ឋាគារ Wyndham Jomtien Pattaya ហើយក៏ជាអ្នកដែលបានកត់ត្រាអត្រាសម្ពាធឈាមហក់ឡើងខ្ពស់ របស់នាងខ្ញុំផងដែរ (១៤២/៩០ និង១៥១/៩០) ។ ទោះជាយ៉ាងណាក៏ដោយ នាងខ្ញុំត្រូវបានក្រុមការងារ MGI ផ្តល់អោយនូវថ្នាំដែលមិនស្គាល់អត្តសញ្ញាណដែលអាចបណ្តាលអោយនាងខ្ញុំប្រឈមនឹងបញ្ហាអាឡេកហ្ស៊ីបាន ។ ទោះបីជាស្ថាប័ន MGI បានសន្យាក្នុងការទទួលការខុសត្រូវ ចំពោះសុខុមាលភាពនៃនាងខ្ញុំក៏ដោយចុះក៏ប៉ុន្តែពួកគេក៏ជាមូលហេតុចម្បងផងដែរ នៃវិបត្តិចំពោះសុខភាពផ្លូវកាយ និងផ្លូវចិត្តរបស់ខ្ញុំ ។ ពួកគេបានបរាជ័យក្នុងការហៅវេជ្ជបណ្ឌិត នៅពេលដែលនាងខ្ញុំសន្ល.ប់ ហើយបានបង្ខិតបង្ខំអោយនាងខ្ញុំធ្វើការជាមួយនឹងស្ថានភាពគ្រុនក្តៅ៣៨.៥ អង្សាសេ ព្រមដោយសម្ពាធឈាម១៥១/៩០ ។
ក្រៅពីបញ្ហាសុខភាព កញ្ញា Kateryna Bilyk បានសង្កត់ថា ៖ លើសពីនេះ ក្រុមការងាររបស់ MGI បានរឹបអូសលិខិតឆ្លងដែនរបស់នាងខ្ញុំរយៈពេល៣ថ្ងៃនៅកម្ពុជា ដោយខុសច្បាប់ និងជាការរឹតត្បិតសិទ្ធិសេរីភាពក្នុងការធ្វើសកម្មភាពរបស់នាងខ្ញុំ ។ នាងខ្ញុំបានប្រមូលភស្តុតាងបានទាំងអស់ក្នុងនោះមានដូចជា វីដេអូទំហំ៥២gb រូបថត វិក័យប័ត្រ ឯកសារ និងកាលវិភាគការងារទាំងអស់ ។
បន្ថែមពីនេះ ពួកគេបានបង្ខំអោយនាងខ្ញុំ និងអ្នកដទៃទៀតធ្វើការទាំងដែលពួកយើងមានតែវីសាទេសចរណ៍ ដែលប្រឆាំងទៅនឹងច្បាប់នៃប្រទេសថៃ ។ លើសអំពីនេះទៅទៀតអ្នកគ្រប់គ្រងនៃ MGI បានធ្វើការទូរស័ព្ទព្រមទាំងផ្ញើសារមកគម្រាមកំហែង ទាំងនាងខ្ញុំ និងមនុស្សដទៃទៀតដែលជាការល្មើស សិទ្ធិសេរីភាព និងច្បាប់អន្តរជាតិ ។
កញ្ញាបានបន្តរថា ការព្យាយាមណាមួយក៏ដោយក្នុងការផ្សព្វផ្សាយព័ត៌មានក្លែងក្លាយ ឬបំផ្លិចបំផ្លាញកេរ្តិ៍ឈ្មោះរបស់នាងខ្ញុំនឹងទទួលបានការតបជាលទ្ធផលភ្លាមៗ គឺការចាត់ការតាមវិធានការផ្លូវច្បាប់ដោយសមត្ថកិច្ចថៃ និងអន្តរជាតិ ។ នាងខ្ញុំសូមរក្សាសិទ្ធិក្នុងការប្រើប្រាស់វិធានការផ្លូវច្បាប់ និងទាមទារសំណងចំពោះការខូចខាតដែលកើតឡើង ។
បន្តិចក្រោយមកបន្ទាប់ ពីបង្ហោះសេចក្តីថ្លែងការណ៍ខាងលើ Miss Grand Ukraine បានបន្ថែមការព្រមានទៅកាន់មិត្តរួមក្រុមទាំង៧០ផ្សេងទៀត ឬអ្នកណាក៏ដោយដែលផ្សព្វផ្សាយមិនពិតតាមបញ្ជាញ៉ុះញ៉ង់របស់ប៉ាប៉ា ម៉ាក់ៗ នោះ កញ្ញានឹងប្តឹងទាំងអស់ព្រោះនាងបានត្រៀមមេធាវីរួចរាល់ហើយ ។
កញ្ញា Kateryna Bilyk Miss Grand Ukriane បានរៀបរាប់ថា: «ខ្ញុំសូមរំលឹកអ្នករាល់គ្នាដែលយាយម្នាក់នឹងសុំអោយផ្សព្វផ្សាយសេចក្តីថ្លែងការណ៍បង្ខូចកេរ្តិ៍អំពីខ្ញុំធ្លាក់នៅក្រោមច្បាប់បរិហារកេរ្តិ៍ (អាចដាក់ពិន័យរហូតដល់៥ឆ្នាំជាប់គុកនៅប្រទេសថៃ) ។ ហើយមេធាវីរបស់ខ្ញុំ កំពុងធ្វើការលើរឿងនេះរួចហើយ ។ រាល់ Comment ត្រូវបានបិទ ហើយពួកគេកំពុងព្យាយាមលុបការបង្ហោះ និងគណនីរបស់ខ្ញុំ ។
សូមជម្រាបថា » ក្រៅពីMiss Grand Ukraine ដែលប្រកាសដកខ្លួន Miss GrandHong Kong ក៏បានប្រកាសដកខ្លួនពីការប្រកួតដូចគ្នា តែនៅមិនទាន់ចេញមកបញ្ជាក់ពីមូលហេតុនៅឡើយទេ ។ តែអ្នកគាំទ្រចាំបានថា បវរកញ្ញាមកពីទីក្រុងហុងកុងរូបនេះធ្លាប់បង្ហោះសារ លា និងអរគុណកម្ពុជាកំឡុងពេលដែលនាងចាកចេញភ្លាមៗពីកម្ពុជាទៅប្រកួតបន្តនៅថៃដោយសារនោះមានខ្លឹមសារថា «ដំណើរកម្សាន្តនៅកម្ពុជា Bye bye Cambodia & say hi to Thailand អរគុណសម្រាប់គ្រប់យ៉ាងនៅក្នុងប្រទេសកម្ពុជា និងអ្នកទាំងអស់គ្នាដែលខ្ញុំបានជួបនៅទីនោះ សូមព្រះប្រទានពរ» ៕