ឯកឧត្តមអភិសន្តិបណ្ឌិត ស សុខា រដ្ឋមន្ដ្រីក្រសួងមហាផ្ទៃ ៖ ចំពោះមន្ដ្រីនគរបាលរូបណាមានក្បាលពោះធំ គឺហាមមិនឲ្យចេញទៅបំពេញការងារនៅខាងក្រៅជាដាច់ខាត

21 ម៉ោងមុន

រាជធានីភ្នំពេញ ៖ មតិសាធារណៈជននាំគ្នាលើកឡើងថា បើមន្ត្រីសមត្ថកិច្ចមានក្បាលពោះធំឬធាត់ម្លឹងៗ តើដេញចាប់ជនល្មើសយ៉ាងម៉េច? ។ ការលើកឡើងបែបនេះ បន្ទាប់ពីឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានលើកឡើងថា សមត្ថកិច្ចមានក្បាលពោះធំមិនអនុញ្ញាតឲ្យបំពេញការងានៅខាងក្រៅឡើយ។

យោងតាមសារសម្លេងបញ្ជាក់របស់ឯកឧត្តមឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ បានបញ្ជាក់ជាថ្មីថា ចំពោះមន្ដ្រីនគរបាលរូបណាមានក្បាលពោះធំ គឺហាមមិនឲ្យចេញទៅបំពេញការងារនៅខាងក្រៅតាមទីសាធារណៈចុះបង្ក្រាបជាដើម ប៉ុន្ដែត្រូវបំពេញការងារនៅក្នុងការិយាល័យវិញ។

តាមសារបញ្ជាក់របស់ឯកឧត្តមឧបនាយករដ្ឋមន្ដ្រី ស សុខា ពាក់ព័ន្ធនឹងករណីមន្ត្រីកងកម្លាំងនគរបាល ដែលមានក្បាលពោះធំ ផ្ញើជូនស្នងការដ្ឋាននគរបាលរាជធានី-ខេត្ត នៅថ្ងៃទី១៦ ខែតុលា ឆ្នាំ២០២៤។

ឯកឧត្តមបានគូសបញ្ជាក់ថា «ខ្ញុំសូមរំលឹកសារជាថ្មី ស្នើសុំធ្វើយ៉ាងម៉េច នគរបាលដែលគាត់មានមាឌធំ ដុះក្បាលពោះ គឺមិនមែន មិនឲ្យធ្វើការនោះទេឲ្យធ្វើការ ប៉ុន្ដែធ្វើការនៅប្រូ ហាមដាច់ខាតកុំឲ្យគាត់ចេញទៅអនុវត្តកិច្ចការងារ ជាពិសេស ទៅលើការប៉ះពាល់ជាមួយមហាជន ជាពិសេស ខាងក្រៅនេះ ដូច្នេះ សូមអនុវត្តកិច្ចការងារនេះឲ្យម៉ឺងម៉ាត់»។

តាមប្រមុខក្រសួងមហាផ្ទៃ បើមន្ដ្រីនរគបាលទាំងនោះ ចង់ចេញបំពេញការងារនៅខាងក្រៅ ចុះបង្ក្រាប ប្រតិបត្តិការនានាត្រូវសម្រកក្បាលពោះជាមុនសិន។

ទាក់និងករណីនេះដែរ លោករ៉េន រតនៈ ជំនួយការ និងជាអ្នកនាំពាក្យ ឯកឧត្តមអភិសន្តិបណ្ឌិតបានផ្តល់ជាហេតុផលផង ហេតុអ្វីបានជាឯកឧត្តមឧបនាយករដ្ឋមន្ត្រី ស សុខា ណែនាំបែបនេះថា ៖
ទី១-គឺគោលការណ៍កាយសម្បទា៖ ជាសត្យានុម័ត ជាពិសេស សម្រាប់កងកម្លាំងចេញប្រតិបត្តិការអនុវត្តច្បាប់នានា ត្រូវតែមានកាយសម្បទាមាំមួន មិនស្គមពេក មិនធាត់ពេក ពិសេស មិនគួរធាត់មានក្បាលពោះធំហួស ដែលនាំឱ្យមានការលំបាកពេលបំពេញការងារ ដូចជាបាត់ភាពរហ័សរហួន និងឆាប់ហត់ជាដើម។
ទី២-គោលការណ៍សុខភាព៖ កងកម្លាំងដែលធាត់ហួស ក៏ដូចជនទូទៅដែរ គឺជារួមមានសុខភាពមិនសូវល្អទេ ប្រឈមនិងហានិភ័យគ្រប់ពេលវរលា ។ កងកម្លាំងយើងត្រូវតែមានសុខភាពល្អមាំមួន ដើម្បីបំពេញបេសកម្មបម្រើជាតិ និងប្រជាជនបានល្អ ។ ម្យ៉ាងពួកគាត់មានសុខភាពល្អ ក៏ជាសំណាងរបស់រដ្ឋ និងក្រុមគ្រួសារ ដែលភាគច្រើនក៏មានប្ដី និងឪពុកជាកងកម្លាំងដែរ។
ទី៣-គោលការណ៍សាធារណមតិ៖ ករណីនេះ កន្លងមកទោះជាក្នុងចំណោមកងកម្លាំងសរុប មានតិចតួចនូវករណីកងកម្លាំងមានក្បាលពោះធំជ្រុលនេះ ប៉ុន្តែពេលកងកម្លាំងនោះចេញប្រតិបត្តិការខាងក្រៅ ដូចជាសម្រួលចរាចរណ៍ និងបង្ក្រាបជនល្មើសជាដើម មហាជនតែងមានការចាប់អារម្មណ៍ និងនិយាយបង្អាប់ផង រិះគន់ផង ដូចជាបើក្បាលពោះធំឬធាត់ម្លឹងៗ តើដេញចាប់ជនល្មើសយ៉ាងម៉េចជាដើម?
អ្នកនាំពាក្យបានបញ្ជាក់ថា «ដូច្នេះហើយបានជាឯកឧត្តមអភិសន្តិបណ្ឌិត លោកបានណែនាំដល់អគ្គស្នងការនគរបាលជាតិ និងស្នងការដ្ឋាននគរបាលរាជធានីខេត្ត យកចិត្តទុកដាក់រៀបចំកងកម្លាំងដែលមានក្បាលពោះធំជ្រុលនេះឱ្យបំពេញការងារនៅខាងក្នុងការិយាល័យ ដោយជំរុញឱ្យខិតខំធ្វើលំហាត់ប្រាណ ពោលគឺបើចង់ចេញបំពេញការងារខាងក្រៅ ត្រូវតែហាត់ប្រាណដើម្បីធានាភាពមាំទាំ សុខភាពល្អ និងបញ្ចៀសការរិះគន់ទាំងឡាយ»៕

ពត័មានពេញនិយម

អំពីយើង

ជួបគ្នានៅបណ្តាញសង្គម

ទំនាក់ទំនង