រាជធានីភ្នំពេញ៖ អ្នកគ្រប់គ្រងផ្សារទំនើបអ៊ីអន៣ កាលពីល្ងាច ថ្ងៃទី៧ ខែកក្កដា ឆ្នាំ២០២៤ បានពាំនាំនូវក្រុមល្ខោនបាសាក់វង់ «ភីសុគន្ធ» មកសម្ដែង នៅក្នុងផ្សាររបស់ខ្លួន ហើយបានទាក់ទាញអ្នកចូលទស្សនាយ៉ាងច្រើន ស្ទើរតែរកកន្លែងឈរ ឬអង្គុយមើលមិនចង់ឃើញ ព្រោះតែក្រុមសិល្បករ-សិល្បការិនីរបស់វង់ល្ខោនមួយនេះ ពោរពេញទៅដោយទេពកោសល្យសម្ដែងយ៉ាងប៉ិនប្រសប់បំផុត នៅក្នុងការសម្ដែងរឿង«ពេជ្រសុវណ្ណ ចន្ទ តារា ធីតាវត្តី»។

ផ្សារទំនើប Aeon 3 បានរៀបចំព្រឹត្ដិការណ៍សម្ដែងល្ខោនបាសាក់នេះឡើង ក៏ជាការពញ្ញាក់ស្មារតីដល់កុលបុត្រកុលធីតាខ្មែរទាំងអស់ ត្រូវតែជួយជ្រោមជ្រែង និង ថែរក្សានូវកេរមរតកសិល្បៈ វប្បធម៌ និង អរិយធម៌របស់ដូនតាខ្មែរយើង ដែលបានបន្សល់ទុកមក អស់រយៈពេលរាប់ពាន់ឆ្នាំកន្លងមកហើយ ដើម្បីឲ្យនៅគង់វង្សទៅមុខ សម្រាប់កូនខ្មែរជំនាន់ក្រោយៗបន្ដទៀត។ ការរៀបចំព្រឹត្ដិការណ៍សម្ដែងសិល្បៈល្ខោនបាសាក់នេះ បានទាក់ទាញទស្សនិកជនយ៉ាងច្រើន ចូលទៅទស្សនា មិនធ្លាប់មានពីមុនមក នៅក្នុងផ្សារទំនើបបែបនេះ។

ទម្រង់សិល្បៈទស្សនីយភាព ដែលដូនតាខ្មែរយើង បានបន្សល់ទុកមក ដោយបានយកឈ្មោះ នៅក្នុងទម្រង់លក្ខណៈខុសៗគ្នាជាច្រើន។ ទម្រង់ខ្លះបានយកឈ្មោះចេញ អំពីឧបករណ៍តន្ត្រី ឬ វង់តន្ត្រីណាមួយ ដូចជា ល្ខោនយីកេ ឬ ល្ខោនមហោរី…ជាដើម។ ប៉ុន្តែទម្រង់ខ្លះទៀត បានយកឈ្មោះពីសិល្បករ ដែលមានប្រជាប្រិយភាពខ្លាំងលើសលប់ ដូចជា សិល្បៈចម្រៀងអាយ៉ៃ…។ សម្រាប់ល្ខោនបាសាក់វិញ ក៏មិនខុសពីទម្រង់ដទៃទៀតប៉ុន្មានដែរ ប៉ុន្តែដោយគ្រាន់តែសិល្បៈមួយប្រភេទនេះ បានយកឈ្មោះរបស់ខ្លួន ចេញពីទីកន្លែងកំណើត នៃទម្រង់សិល្បៈនេះ ដែលបានរីកចម្រើន ពោលគឺល្ខោនបាសាក់ ដោយមានដើមកំណើត នៅក្នុងស្រុកបាសាក់ ខេត្តឃ្លាំង ទល់មុខនឹងខេត្តព្រះត្រពាំង កម្ពុជាក្រោម ដែលកាលណោះ ស្ថិតនៅជាទឹកដីរបស់ខ្មែរយើង។ លុះក្រោយមក បារាំងបានកាត់ទឹកដីទាំងនោះទៅឲ្យវៀតណាម ខណៈដែនដីឥណ្ឌូចិន ស្ថិតនៅក្រោមអាណានិគមរបស់បារាំង៕ ដោយកញ្ញា លីលី

រូបភាពពី Facebook Chhim Nouv