នៅថ្ងៃទី៨ ខែកក្កដានេះ ជាថ្ងៃចុងក្រោយនៃដំណើរបំពេញទស្សនាកិច្ចផ្លូវការបស់ ឯកឧត្តម ជិន ភីល័ គ្រូអ៊ិច (Jean-Pierre Lacroix) អគ្គលេខាធិការរងអង្គការសហប្រជាជាតិ UN រយៈពេល​៤​ថ្ងៃ នៅកម្ពុជា។ ដំណើរទស្សនៈកិច្ច បានអញ្ជើញពិនិត្យលើការងារដោះមីន ការ​រៀប​ចំកម្លាំង​ត្រៀមការគ្រប់គ្រង និងការហ្វឹកហ្វឺនកងកម្លាំងថែរក្សាសន្តិភាពរបស់កម្ពុជា មុននឹង​ចាត់​បញ្ជូ​ន​កង​កម្លាំង​ទ័ព​មួកខៀវចូលរួមបំពេញបេសកកម្មថែរក្សាសន្តិភាព UN ។

ជារួមនៅក្នុងដំណើរទស្សនៈកិច្ចផ្លូវការនេះ ឯកឧត្តមអគ្គលេខាធិការរង UN បាន​​ធ្វើ​ការ​កោត​សរសើរ​កម្ពុ​ជា ដែលបានធ្វើការងារល្អប្រសើរ លើការងារត្រៀម និងការគ្រប់គ្រង ការហ្វឹកហ្វឺន​កង​កម្លាំង​ថែ​រក្សាសន្តិភាព មុននឹងចាត់បញ្ជូន​កង​កម្លាំង​ទាំង​នោះចូ​ល​រួម​បំពេញ​បេសកកម្ម​ថែ​រក្សា​សន្តិភាព​ក្រប​ខ័ណ្ឌ UN ហើយថា កម្ពុជាជាប្រទេសជោគជ័យ​លើ​ការប្រែក្លាយ​ពី​ប្រទេស​ដែល​រ​ង​គ្រោះដោ​យ​សារសង្គ្រាម ទៅជាប្រទេសចូលរួម​ចំណែក​ក្នុង​ការ​បញ្ជូន​កង​កម្លាំង​រក្សា​សន្តិភាព​ក្នុង​ក្រប​ខ័ណ្ឌ​UN ដើម្បីចូលរួមធានានូវសុខសន្តិសុខ និងសុវត្ថិភាព ដល់បណ្ដាប្រទេសដទៃទៀត ដែល​ការណ៍នេះគឺជាគំរូដ៏ល្អមួយសម្រាប់ បណ្ដាប្រទេសផ្សេងទៀតជុំវិញពិភពលោក។

ឯកឧត្តម​អគ្គលេខាធិការរង UN ថ្លែងថា UN បន្តការគាំទ្រ និងបន្តកិច្ចសហប្រតិបត្តិការ​យ៉ាង​រឹងមាំ ជាមួយនឹងរាជរដ្ឋាភិបាលកម្ពុជា ជាពិសេស​លើ​កិច្ច​សហប្រតិបត្តិការ​បញ្ជូន​កង​កម្លាំ​ងរក្សា​សន្តិភាព​របស់ខ្លួន ចូលរួមកាងារប្រតិបត្តិការថែរក្សាសន្តិភាព UN ហើយតាមរយៈ​ការ​ចូលរួម​ប្រតិបត្តិការ​ថែ​រក្សាសន្តិភាព UN រយៈពេល១៨ឆ្នាំមកនេះ កម្ពុជាទទួលបានចំណេះដឹង និង​ពិសោធន៍​ច្រើន និងស្នើឲ្យចែករំលែកបទពិសោធន៍ និងជំនាញវិជ្ជាជីវៈនេះ​ជូន​ដល់​បណ្តា​ប្រទេស​ដទៃ​ពិសេសការងារដោះមីន និងកម្ទេចគ្រឿងផ្ទុះ។

នាយឧត្តមសេនីយ សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រងកម្លាំងរក្សាសន្តិភាព បាន​ថ្លែង​ថា តាមរយៈដំណើរបំពេញទស្សនៈកិច្ចរបស់មន្ត្រីជាន់ខ្ពស់ UN មកកម្ពុជានេះ​ត្រូវ​បាន​UN​សំណូមព​រ​រៀប​ចំ​កង​កម្លាំងត្រៀមបំរុង ខណៈកម្ពុជាក៏បានដាក់បញ្ចូល​កង​កម្លាំង​រក្សា​សន្តិភាព​ចូល​ទៅក្នុងប្រព័ន្ធត្រៀមជាស្រាច់របស់អង្គការសហប្រជាជាតិ UN PCRS មានចំនួន​៤​កង​រួម​មាន៖ កងវិស្វកម្មព្រលានយន្តហោះមួយកងចំនួន១២៩នាក់ កងស្ពានបណ្តែតទឹក និង​ចល័ត​លើ​គោក ១កង ចំនួន១៩៤នាក់ និងកងអាវុធហត្ថ ១កងចំនួន១១៩នាក់ រួចហើយ​ហើយ​កង​ទាំង​នេះ​អស់ត្រូវបានត្រួតពិនិត្យសុខភាព និងបានហ្វឹកហ្វឺនជំនាញរួចរាល់អស់ហើយ ដើម្បី​ត្រៀម​ចាត់​បញ្ជូនរហ័សក្នុងការប្រតិបត្តិការថែរក្សាសន្តិភាពអន្តរជាតនៅថ្ងៃខាងមុខ៕