ភ្នំពេញ ៖ កម្ពុជា-អាល្លឺម៉ង់ បានរៀបចំពិធីចុះហត្ថលេខាលើកិច្ចព្រមព្រៀង ស្តីពី៖ ការអភិរក្សបេតិកភណ្ឌវប្បធម៌ក្នុងព្រះរាជាណាចក្រកម្ពុជា, ក្រោមវត្តមានលោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ និងឯកឧត្តម Stefan Messerer ឯកអគ្គរដ្ឋទូតអាល្លឺម៉ង់ប្រចាំកម្ពុជា។

​អនុស្សារណៈនៃការយោគយល់គ្នានេះ បានចុះហត្ថលេខា នារសៀលថ្ងៃទី៩ ខែកក្កដា ឆ្នាំ២០២៤នេះ រវាងឯកឧត្តម ហង់ ពៅ អគ្គនាយកអាជ្ញាធរជាតិអប្សរា និងឯកឧត្តម Stefan Messerer ឯកអគ្គរដ្ឋទូតអាល្លឺម៉ង់ប្រចាំកម្ពុជា។

សេចក្តីដោយឆន្ទៈរួមស្តីពីការអភិរក្សបេតិកភណ្ឌវប្បធម៌ក្នុងព្រះរាជាណាចក្រកម្ពុជា រវាងក្រសួងវប្បធម៌ និងវចិត្រសិល្បៈ នៃព្រះរាជាណាចក្រកម្ពុជា (តទៅនេះ ហៅថា MCFA) និងការិយាល័យសហព័ន្ធកិច្ចការបរទេសនៃសាធារណរដ្ឋសហព័ន្ធអាល្លឺម៉ង់ (តទៅនេះ ហៅថា ការិយាល័យសហព័ន្ធកិច្ចការបរទេស)។

សូមបញ្ជាក់ផងដែរ៖ ដោយយោងទៅលើអនុស្សរណៈនៃការយោគយល់គ្នាដែលបានចុះហត្ថលេខានាថ្ងៃទី១៤ ខែធ្នូ ឆ្នាំ២០១៧ និងកិច្ចព្រមព្រៀងបន្ថែមដែលបានចុះហត្ថលេខានាថ្ងៃទី១១ ខែធ្នូ ឆ្នាំ២០១៩ រវាងអាជ្ញាធរជាតិ ដើម្បីការពាររមណីយដ្ឋាន និងរៀបចំតំបន់អង្គរ ហៅកាត់ថា “អាជ្ញាធរជាតិអប្សរា” និង TH Koeln University of Applied Sciences ("TU Koeln") ពាក់ព័ន្ធនឹងគម្រោងសហប្រតិបត្តិការលើវិស័យអភិរក្ស បេតិកភណ្ឌវប្បធម៌ក្នុងព្រះរាជាណាចក្រកម្ពុជា៖ “ការអភិរក្សប្រាសាទនានានៃរមណីយដ្ឋានអង្គរ៖ ការបន្តការ អភិរក្សតាមបែបវិទ្យាសាស្ត្រនៃក្បាច់លម្អថ្ម និងចម្លាក់ប្រាសាទផ្សេងៗទៀត” (តទៅនេះហៅថា គម្រោងI) និងការបណ្តុះបណ្តាល និងការអប់រំបន្ថែមលើអ្នកអភិរក្សថ្ម ចម្លាក់ និងឥដ្ឋ នៃក្រុម GARCP/GACP និង បុគ្គលិក (អ្នកជំនាញ) ក្នុងនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា តទៅនេះ ហៅថា គម្រោងII) ដែលនឹងដំណើរការដោយកិច្ចសហប្រតិបត្តិការរវាង គម្រោងអាល្លឺម៉ង់ដើម្បីអភិរក្ស ចម្លាក់អប្សរា (GACP) និងអាជ្ញាធរជាតិអប្សរា ក្នុងក្របខ័ណ្ឌនៃគម្រោងជួសជុល និងអភិរក្សអាល្លឺម៉ង់ និងអាជ្ញាធរជាតិអប្សរាហៅកាត់ថា (GARCP) ក្នុងកិច្ចខិតខំប្រឹងប្រែង ដើម្បីអភិរក្សក្បាច់ចម្លាក់ដ៏មានតម្លៃនៅក្នុងប្រាសាទខ្មែរ ដែលជាបេតិកភណ្ឌវប្បធម៌របស់កម្ពុជា៕