រាជធានីភ្នំពេញ៖ ចោរ២នាក់ ប្រដាប់ដោយកាំបិតបុ័ងតោ បានចេញធ្វើសកម្មភាពដេញកាប់ និង ធ្លាក់ប្លន់យកម៉ូតូ ពីអ្នកដំណើរតាមដងផ្លូវ តែមិនសម្រេច ក៏រត់ចោលម៉ូតូរបស់ពួកគេ កាលពីវេលាម៉ោង៩ និង៣០នាទីយប់ ថ្ងៃទី១១ ខែឧសភា ឆ្នាំ២០២៤ នៅតាមផ្លូវជាតិលេខ៤ ត្រង់ចំណុចមុខសាលាបឋមសិក្សារអូដឹម ស្ថិតក្នុងភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។

ជនរងគ្រោះ បានឱ្យដឹងថា នៅមុនពេលកើតហេតុ ពួកគេទាំង២នាក់ បានជិះម៉ូតូ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០២២ ពណ៌ខ្មៅ ពាក់ស្លាកលេខ ព្រៃវែង 1X-1221 តាមបណ្តោយផ្លូវបេតុងមួយខ្សែ ក្នុងបុរីសែនមនោរម្យ ក្នុងភូមិកន្ទោកខាងជើង សង្កាក់កន្ទោក ខណ្ឌកំបូល រាជធានីភ្នំពេញ នៅក្នុងទិសដៅពីត្បូងទៅជើង។ លុះពេលពួកគេធ្វើដំណើរមកដល់ចំណុចភូមិកើតហេតុ ស្រាប់តែលេចមុខចោរ២នាក់ បានជិះម៉ូតូ១គ្រឿង ម៉ាកស៊ុយហ្ស៊ុយគីនិក ពណ៌សលាយលឿង ពាក់ស្លាកលេខ ភ្នំពេញ 1CF-4812 ដេញតាមកពីក្រោយ ហើយដកកាំបិតប៉័ងតោ និង ដេញធាក់ផ្លួលម៉ូតូរបស់ខ្លួន ដើម្បីកាប់ប្លន់យកម៉ូតូ ទើបពួកគេស្រែកឆ្លោឡាឡើង ថា ចោរៗ បង្កឱ្យមានការភ្ញាក់ផ្អើលដល់ប្រជាពលរដ្ឋ នាំគ្នាជិះម៉ូតូនាំគ្នាដេញតាម។ ប៉ុន្ដែដោយសារតែក្រុមចោរទាំង២នាក់ភ័យស្លន់ស្លោខ្លាំងពេក ក៏រអិលដួលម៉ូតូ ហើយនាំគ្នារត់គេចខ្លួនបាត់អស់ ដោយបានបន្សល់ម៉ូតូ១គ្រឿង និង កាំបិតប៉័ងតោ១ដើម។

ក្រោយពេលកើតហេតុ សមត្ថកិច្ចបានចុះទៅយកម៉ូតូរបស់ចោរ និង កាំបិតបុ័ងតោ មករក្សារទុកនៅប៉ុស្តិ៍នគរបាលរដ្ឋបាលចោមចៅទី៣ ដើម្បីស្រាវជ្រាវស្វែងរកជនសង័្សយ នាំមកចាត់ការតាមច្បាប់៕