ពិតជាគំរូល្អមែន ផ្សារធំបាត់ដំបងជាផ្សារដែលមិនមានលក់ម្ហូបអាហារមានជាតិគីមី

07-វិច្ឆិកា-2024 - ម៉ោង 03:43:PM

ខេត្តបាត់ដំបង ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា ក.ប.ប. នៃក្រសួងពាណិជ្ជកម្ម បានប្រកាសឱ្យដឹងថា ម្ហូបអាហារដែលមានដូចជា គ្រឿងសមុទ្រ ត្រីសាច់ ប្រហិត ស្ពៃជ្រក់ សរសៃគុយទាវ ដែលដាក់នៅផ្សារធំបាត់ដំបង នៅក្នុងក្រុងបាត់ដំបង ពុំមានរកសារធាតុគីមីហាមឃាត់ ដែលប៉ះពាល់ដល់សុខភាពអ្នកបរិភោគនោះឡើយ ។

តាមរយៈផេកហ្វេសបុកផ្លូវការ នៅថ្ងៃទី០៦ ខែវិច្ឆិកា ឆ្នាំ២០២៤នេះ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានបញ្ជាក់ថា កាលពីថ្ងៃអង្គារ ទី៥ ខែវិច្ឆិកា ឆ្នាំ២០២៤ មន្ត្រីអធិការកិច្ចម្ហូបអាហារនៃសាខា ក.ប.ប. ខេត្តបាត់ដំបង បាននាំយករថយន្តមន្ទីរពិសោធន៍ចល័តផ្នែកម្ហូបអាហារ និងក្រោមកិច្ចសហការជាមួយគណៈគ្រប់គ្រងផ្សារបានចុះត្រួតពិនិត្យ ធ្វើតេស្តបឋម ម្ហូបអាហារ គ្រឿងសមុទ្រ ត្រីសាច់ ប្រហិត ស្ពៃជ្រក់ សរសៃគុយទាវ នៅផ្សារធំបាត់ដំបង ស្ថិតនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។
ក្នុងសកម្មភាពចុះត្រួតពិនិត្យនោះ មន្ត្រីជំនាញសាខា ក.ប.ប. ខេត្តបាត់ដំបង បានដកយកគំរូម្ហូបអាហារចំនួន៩មុខ ដែលអាជីវករដាក់លក់ក្នុងផ្សារធំបាត់ដំបង ដើម្បីយកវិភាគបឋមនៅក្នុងរថយន្តមន្ទីរពិសោធន៍ចល័ត ដើម្បីស្វែងរកសារធាតុគីមីហាមឃាត់ ។ អ្វីដែលគួរឱ្យកត់សម្គាល់នោះជាលទ្ធផលនៃការតេស្តបឋម មន្ត្រីជំនាញរកពុំឃើញមានសារធាតុគីមីហាមឃាត់ឡើយ តែយ៉ាងណាក៏ដោយមន្ត្រីជំនាញក៏បានបន្តណែនាំអាជីវករទាំងអស់ត្រូវលក់ដូរទំនិញត្រូវគោរពតាមគោលការណ៍អនាម័យឪ្យបានត្រឹមត្រូវ ។
គួរបញ្ជាក់ផងដែរថា ក្រៅពីផ្សារធំបាត់ដំបង ផ្សារប្រពៃណីចំនួន២ផ្សេងទៀត នៅឯខេត្តកំពង់ធំ គឺផ្សារតាំងក្រសាំង និងផ្សារថ្នល់បែក ក៏ត្រូវបានមន្ត្រីជំនាញបញ្ជាក់ថា មានភាពគំរូស្រដៀងគ្នានឹងផ្សារធំបាត់ដំបូងដែរ ប៉ុន្តែទៅលើផលិតផលប្រើប្រាស់គ្រឿងសម្អាង ។

ជាក់ស្តែង នៅថ្ងៃទី៥ ខែវិឆ្ឆិកា ឆ្នាំ២០២៤ តំណាលគ្នានោះ មន្ត្រីសាខា ក.ប.ប. ខេត្តកំពង់ធំ ចូលរួមសហការដោយមន្ត្រីនៃមន្ទីរពាណិជ្ជកម្មខេត្ត គណៈគ្រប់គ្រងផ្សារ និងប៉ូលិសប៉ុស្តិ៍ បានចុះអង្កេតក្នុងផ្សារចំនួន០២ ផ្សារតាំងក្រសាំង និងផ្សារថ្នល់បែក ដើម្បីពិនិត្យសុវត្ថិភាពម្ហូបអាហារ និងផលិតផលប្រើប្រាស់គ្រឿងសម្អាងមានដូចជា៖ ឡេលាបខ្លួន សាប៊ូដុសខ្លួន ម៉ាស់បិតមុខ ប្រេងក្រឡា និងផលិតផលប្រើប្រាស់ចម្រុះតាមតូប និងផ្ទះលក់ទំនិញជុំវិញផ្សារ ។

ជាលទ្ធផលនៃការចុះត្រួតពិនិត្យ មន្ត្រីជំនាញរកពុំឃើញមានទំនិញផលិតផលណាដែលមិនអនុលោមតាមច្បាប់កំណត់នោះឡើយ ។ បន្ថែមពីនោះ មន្ត្រីជំនាញបានណែនាំអប់រំដល់អាជីវករបន្ថែមនូវបទប្បញ្ញត្តិ ព្រមទាំងនីតិវិធីនៃការថែរក្សាផលិតផលល្អលក់ជូនអ្នកប្រើប្រាស់ ៕

ពិតជាគំរូល្អមែន ផ្សារធំបាត់ដំបងជាផ្សារដែលមិនមានលក់ម្ហូបអាហារមានជាតិគីមី

ពត័មានពេញនិយម

អំពីយើង

ជួបគ្នានៅបណ្តាញសង្គម

ទំនាក់ទំនង