រាជធានីភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញ បានបញ្ជាដល់អាជ្ញាធរខណ្ឌទាំង១៤ ត្រូវរៀបចំសណ្ដាប់ធ្នាប់សាធារណៈ និង ពង្រឹងសន្តិសុខឱ្យបានល្អប្រសើរបំផុត សម្រាប់ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ព.ស.២៥៦៩ គ.ស.២០២៥ ដែលនឹងចូលមកដល់ នាពេលដ៏ខ្លីខាងមុខនេះ។

ឯកឧត្តម ឃួង ស្រេង អភិបាលរាជធានីភ្នំពេញ បានលើកឡើង នៅក្នុងកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ នៅសាលារាជធានីភ្នំពេញ កាលពីរសៀល ថ្ងៃទី៤ ខែមេសា ឆ្នាំ២០២៥ ដោយបានជំរុញឲ្យបន្តត្រួតពិនិត្យវឌ្ឍនភាព លើការងារសន្តិសុខ សណ្តាប់ធ្នាប់ និង របៀបរៀបរយសាធារណៈ នៅក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ នាឆ្នាំ២០២៥ ដែលនឹងចូលមកដល់នៅថ្ងៃទី១៤ ខែមេសា ខាងមុខនេះ។

ឯកឧត្តម អភិបាលរាជធានីភ្នំពេញ បានណែនាំដល់កម្លាំងគណៈបញ្ជាការឯភាពខណ្ឌទាំងអស់ ក៏ដូចជា កម្លាំងសមត្ថកិច្ចជំនាញ ត្រូវយកចិត្តទុកដាក់ចេញល្បាត និង ត្រួតពិនិត្យអាវុធជាតិផ្ទុះ និង ការត្រួតពិនិត្យជាតិអាល់កុល ហើយអប់រំណែនាំដល់ពលរដ្ឋរស់នៅក្នុងមូលដ្ឋានរបស់ខ្លួន ត្រូវមានការប្រុងប្រយ័ត្នខ្ពស់ និង កុំធ្វេសប្រហែស អំពីគ្រោះអគ្គិភ័យ។ បន្ថែមពីលើនេះ ឯកឧត្តម អភិបាលរាជធានីភ្នំពេញ បានជំរុញឲ្យអាជ្ញាធរ និងសមត្ថកិច្ច សហការគ្នា បែងចែកកម្លាំងល្បាត ទាំងថ្ងៃ ទាំងយប់ ដើម្បីធានា ថា ពិធីបុណ្យចូលឆ្នាំថ្មីប្រពៃណីជាតិខ្មែរ នាឆ្នាំ២០២៥នេះ ប្រព្រឹត្តទៅប្រកបទៅដោយភាពសប្បាយរីករាយ។

ជាមួយគ្នានេះដែរ ឯកឧត្ដមអភិបាលរាជធានីភ្នំពេញ រំពឹង ថា សង្រ្គាន្តវត្តភ្នំ នាឆ្នាំ២០២៥នេះ នឹងមានប្រជាពលរដ្ឋ មកចូលរួមលេងកម្សាន្តសប្បាយយ៉ាងច្រើនកុះករជាងឆ្នាំមុខៗ។ ទន្ទឹមគ្នានេះ ឯកឧត្តមអភិបាលរាជធានី បានណែនាំឲ្យរៀបចំទីបញ្ជាការស្រាលមួយចំនួន ដូចជា ការដាក់ឧបករណ៍បំពងសំឡេង ដោយសហការជាមួយវិទ្យុជាតិកម្ពុជា ដើម្បីងាយស្រួលជួនដំណឹង ដល់ប្រជាពលរដ្ឋ ដែលមកលេងកម្សាន្ត នៅរមណីយដ្ឋានប្រវត្តិសាស្រ្តវត្តភ្នំ ខណៈមានបញ្ហាកើតឡើង ឬត្រូវណែនាំដល់ពួកគាត់ អំពីដំណឹងផ្សេងៗ។

ក្រៅពីនេះ អាជ្ញាធររាជធានីភ្នំពេញ នឹងរៀបចំចំណតរថយន្តក្រុងឲ្យបានសមរម្យ សម្រាប់ដឹកជញ្ជូនប្រជាពលរដ្ឋ មកចូលរួមលេងកម្សាន្ត នាឱកាសបុណ្យចូលឆ្នាំថ្មីប្រពៃណីជាតិខ្មែរ ហើយត្រូវបញ្ចៀសចរាចរណ៍ កុំឲ្យកកស្ទះ នៅកន្លែងលេងកម្សាន្ដសប្បាយ ហើយបានគិតគួរអំពីបរិស្ថាន កន្លែងទុកដាក់សំរាមឲ្យបានត្រឹមត្រូវ សម្រាប់ចូលរួមសកម្មភាពទីក្រុងស្អាត ជាពិសេសកន្លែង ដែលប្រជាពលរដ្ឋ មកចូលរួមលេងកម្សាន្តសប្បាយ។ បន្ថែមពីលើនេះ អាជ្ញាធរ បានរៀបចំតុបតែងភ្លើងពណ៌តាមដងផ្លូវ តាមដើមឈើ លាបថ្នាំឲ្យស្រស់ស្អាត និង ត្រូវត្រួតពិនិត្យប្រព័ន្ធអគ្គិសនី ដើម្បីបង្ការនូវការឆ្លងចរន្តអគ្គិនី ឬ ហានិភ័យណាមួយជាយថាហេតុ។

ស្របគ្នានេះ ឯកឧត្តម អភិបាលរាជធានី បានណែនាំដល់អាជ្ញាធរខណ្ឌទាំង១៤ ត្រូវផ្សព្វផ្សាយ ឬណែនាំដល់ប្រជាពលរដ្ឋ ឲ្យមានការប្រុងប្រយ័ត្ន ចំពោះភ្លើងទៀន ធូប ចរន្តអគ្គិសនី ដែលនាំឱ្យកើតជាជាអគ្គិភ័យជាយថាហេតុ។ បន្ថែមពីលើនេះ អាជ្ញាធរ បានណែនាំដល់ដល់ប្រជាពលរដ្ឋ កុំឲ្យលេងប៉ាតម្សៅ ជះទឹក បាញ់ទឹក ខុសទំនង ឬហួសហេតុ ព្រោះវាអាចបង្កផលប៉ះពាល់ដល់អ្នកដំណើរតាមម៉ូតូ និង តាមរថយន្ត នៅតាមផ្លូវ៕