ខេត្តព្រះសីហនុ៖ អគ្គីបានឆាបឆេះផ្ទះរបស់ពលរដ្ឋ ចំនួន៣ខ្នង បង្កការភ្ញាក់ផ្អើលដល់អ្នកភូមិ រាយការណ៍ទៅសុំអន្ដរាគមន៍ពីសមត្ថកិច្ចជំនាញ ចេញទៅបាញ់ទឹកពន្លត់ កាលពីវេលាម៉ោង២ និង៥០នាទីរសៀល ថ្ងៃទី២ មេសា ឆ្នាំ២០២៥ នៅក្រុម១៥ ភូមិ១ សង្កាត់លេខ៤ ក្រុងព្រះសីហនុ ខេត្តព្រះសីហនុ ។

បើតាមមន្រ្ដីការិយាល័យបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលខេត្តព្រះសីហនុ បានឲ្យដឹង ថា បន្ទាប់ពីមានសេចក្ដីរាយការណ៍ អំពីគ្រោះអគ្គិភ័យបែបនេះភ្លាម សមត្ថកិច្ចបានបើករថយន្ដពន្លត់អគ្គិភ័យជាច្រើនគ្រឿង ចេញទៅធ្វើអន្ដរាគមន៍ បាញ់ទឹកពន្លត់ឲ្យរលត់អស់ទៅវិញ ហើយទប់ស្កាត់មិនឲ្យភ្លើងឆាបឆេះដល់ផ្ទះរបស់អ្នកភូមិផ្សេងៗទៀត។ ប៉ុន្ដែផ្ទះទាំងនេះ ត្រូវបានភ្លើងលេបត្របាក់ក្លាយជាផេះផង់។ ផ្ទះទាំងនេះ រួមមាន៖

១-ផ្ទះទំហំ៨គុណនឹង១២ម៉ែត្រ ធ្វើពីថ្មក្រោមប្រក់ដំបូលស័ង្កសី មានកម្ពស់១ជាន់ និងផ្ទះសង់អំពីឈើជាន់ផ្ទាល់ដី មានទំហំ៤ម៉ែត្រគុណនឹង៦ម៉ែត្រ មានម្ចាស់ ឈ្មោះ អ៊ួង ស្រីនី ភេទស្រី អាយុ៤៦ឆ្នាំ មុខរបរលក់កាហ្វេ ហើយសម្ភារប្រើប្រាស់ក្នុងផ្ទះ ត្រូវភ្លើងឆេះអស់ទាំងស្រុង។

២-ផ្ទះមានទំហំ៨គុណនឹង១២ម៉ែត្រ មានម្ចាស់ឈ្មោះ ត្រង ចំរើន ភេទ ប្រុស អាយុ៣៤ឆ្នាំ មុខរបររត់កង់បី ហើយសម្ភារប្រើប្រាស់ក្នុងផ្ទះ ត្រូវភ្លើងឆេះអស់ទាំងស្រុង។

ទោះជាយ៉ាងណាក៏ដោយ គ្រោះអគ្គិភ័យនេះ មិនបានបង្កឲ្យមានគ្រោះថ្នាក់ដល់មនុស្សណាម្នាក់នោះឡើយ។ បច្ចុប្បន្ន សមត្ថកិច្ចកំពុងតែស្រាវជ្រាវ ស្វែងរកមូលហេតុ បង្កឲ្យកើតមានគ្រោះអគ្គិភ័យនេះ៕