ខេត្តកំពង់ស្ពឺ៖ យុវជនម្នាក់ បានទាស់ពាក្យសម្ដីគ្នាជាមួយនឹងបុរសម្នាក់ រហូតចងគំនុំគុំកួន លបចាក់ប្រហារទៅលើគូទំនាស់ បណ្ដាលឲ្យរងរបួស ហើយត្រូវបានសមត្ថកិច្ចស្រាវជ្រាវ រហូតឃាត់ខ្លួនបាន កាលពីថ្ងៃទី២ ខែមេសា ឆ្នាំ២០២៥ នៅស្រុកបសេដ្ឋ ខេត្តកំពង់ស្ពឺ ហើយកបានកសាងសំណុំរឿង បញ្ជូនទៅកាន់តុលាការ ដើម្បីចាត់ការតាមច្បាប់។

មន្ត្រីនគរបាលស្រុកបសេដ្ឋ បានឲ្យដឹង ថា កាលពីល្ងាច ថ្ងៃទី១ ខែមេសា ឆ្នាំ២០២៥ មានអំពើហិង្សាមួយករណី បានកើតឡើង នៅភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ។ ជនសង័្សយ បានយកកន្ដ្រៃ ចាក់ប្រហារទៅលើជនរងគ្រោះ បណ្តាលឱ្យរងរបួស ចំនួន៤កន្លែង នៅក្រោមថ្គាមខាងស្តាំ១កន្លែង ក្រោមចុងដង្ហើម១កន្លែង ច្រមុះ១កន្លែង និង ដៃខាងស្តាំ១កន្លែង។ របួសរបស់ជនរងគ្រោះ មានសភាពធ្ងន់ធ្ងរ ហើយត្រូវបានក្រុមគ្រួសារបញ្ជូនទៅសង្គ្រោះបន្ទាន់ ខណៈជនសង័្សយបានរត់គេចខ្លួនបាត់។

ប្រភពដដែល បានបន្ដ ថា ក្រោយពេលបញ្ជូនជនរងគ្រោះទៅកាន់មន្ទីរពេទ្យរួចហើយ បងប្រុសបង្កើតរបស់ជនរងគ្រោះ ក៏បានទៅដាក់ពាក្យបណ្តឹង នៅប៉ុស្តិ៍នគរបាលរដ្ឋបាលឃុំភារីមានជ័យ ដើម្បីសុំឲ្យសមត្ថកិច្ចជួយអន្តរាគមន៍ តាមឃាត់ខ្លួនជនសង្ស័យ។ បន្ទាប់ពីមានពាក្យបណ្ដឹងរួចមក សមត្ថកិច្ចពាក់ព័ន្ធ បានសហការគ្នាស្រាវជ្រាវ រហូតឈានដល់ការឃាត់ខ្លួនជនសង័្សយ ឈ្មោះ ឆិត ប្រុសជាតិ ភេទប្រុស អាយុ២២ឆ្នាំ មុខរបរមិនពិតប្រាកដ រស់នៅក្នុងភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ ។ ជនសង័្សយ ជាមនុស្សមានចរិតកាចសាហាវ តែងតែបង្កការអុកឡុក នៅក្នុងមូលដ្ឋាន និងធ្លាប់បញ្ជូនទៅកាន់មណ្ឌលកែប្រែបន្សាបគ្រឿងញៀន ចំនួន១ដងផងដែរ។ រីឯជនរងគ្រោះ ឈ្មោះ អ៊ូច ទិត្យ ភេទប្រុស អាយុ៣៨ឆ្នាំ រស់នៅក្នុងភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ។

ជនសង័្សយ បានសារភាព ថា រូបគេពិតជាបានយកកន្ត្រៃ ចាក់ទៅលើជនរងគ្រោះប្រាកដមែន។ ករណីនេះ បានផ្ដើមចេញពីគំនុំ ព្រោះរូបគេ និង ជនរងគ្រោះ ធ្លាប់មានទំនាស់ជាមួយគ្នា កាលពីពេលកន្លងមក ។

ក្រោយពេលឃាត់ខ្លួនរួចមក សមត្ថកិច្ច បានបញ្ជូនជនសង័្សយ ទៅកាន់អធិការដ្ឋាននគរបាលស្រុកបសេដ្ឋ ដើម្បីកសាងសំណុំរឿង បញ្ជូនទៅកាន់តុលាការ ផ្តន្ទាទោសតាមច្បាប់៕