រាជធានីភ្នំពេញ៖ ក្រោយពេលមានឃ្លីបវីដេអូមួយ ត្រូវបានគេថតពីសកម្មភាពរបស់មន្រ្ដីនគរបាលចរាចរណ៍ម្នាក់ បានលុកដៃយកលុយពីអ្នកបើករថយន្ដធុនធំដឹកឧស នៅចំណុចស្ដុបផ្សារដីហុយ ខណ្ឌសែនសុខ នោះមក បាននាំឲ្យមានការរិះគន់យ៉ាងខ្លាំងនោះមក ស្នងការដ្ឋាននគរបាលរាជធានីភ្នំពេញ បានកោះហៅមន្រ្ដីនគរបាលរូបនោះទៅសាកសួរ។

ស្នងការដ្ឋាននគរបាលរាជធានីភ្នំពេញ បានបង្ហោះសារ និង រូបភាព នៅលើទំព័របណ្ដាញសង្គមហ្វេសប៊ុករបស់ខ្លួន កាលពីថ្ងៃទី៣ ខែមេសា ឆ្នាំ២០២៥ ថា បន្ទាប់ពីមានការផ្សព្វផ្សាយព័ត៌មានតាមបណ្ដាញសង្គម ជុំវិញករណីមន្ត្រីនគរបាលចរាចរណ៍ នៅគោលដៅស្តុបស្ពានអាកាសផ្សារដីហុយ លូកដៃសង្ស័យយកលុយពីអ្នកបើកបររថយន្តធុនធំដឹកឧសនោះភ្លាម នៅរសៀល ថ្ងៃទី៣ ខែមេសា ឆ្នាំ២០២៥ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និង ជាស្នងការនគរបាលរាជធានីភ្នំពេញ បានបញ្ជាឱ្យនាយការិយាល័យនគរបាលចរាចរណ៍ផ្លូវគោក ស្រាវជ្រាវករណីនេះ ហើយបានកោះអញ្ជើញមន្រ្តីរូបនោះ មកសួរនាំ នៅការិយាល័យនគរបាលចរាចរណ៍ផ្លូវគោក។

បច្ចុប្បន្ន លោកអនុសេនីយ៍ឯក សាន វិចិត្រ មន្ត្រីគោលដៅស្តុបស្ពានអាកាសផ្សារដីហុយ ត្រូវបានមន្រ្តីជំនាញ នៃការិយាល័យនគរបាលចរាចរណ៍ផ្លូវគោក កំពុងតែសួរនាំ ដោយសុំគោលការណ៍ ពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និង ជាស្នងការនគរបាលរាជធានីភ្នំពេញ ពិនិត្យសម្រេច។

ប្រសិនមន្រ្តីខាងលើ រកឃើញ ថា មានកំហុសបំពេញភារកិច្ច មិនគោរពច្បាប់ និង មិនគោរពវិន័យនគរបាលជាតិ នឹងប្រឈមសម្រេចអនុវត្តវិន័យកងកម្លាំងនគរបាលជាតិ៕