រដ្ឋធានីវ៉ាស៊ីនតោន៖ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីថ្ងៃពុធ ទី២ ខែមេសា បានហៅជាថ្ងៃដ៏សំខាន់បំផុតមួយ នៅក្នុងគំនិតរបស់ខ្ញុំ នៅក្នុងប្រវត្តិសាស្ត្រអាមេរិក ខណៈគាត់បានបង្ហាញ អំពីតារាងយកពន្ធគយ សម្រាប់ប្រទេសនានា នៅលើពិភពលោក។ នេះបើតាមទូរទស្សន៍របស់សិង្ហបុរី Channel News Asia បានចេញផ្សាយ កាលពីព្រឹក ថ្ងៃសុក្រ ទី៤ ខែមេសា ឆ្នាំ២០២៥។

ក្រុមមន្រ្ដីសហរដ្ឋអាមេរិក បានអះអាង ថា នេះជាផ្នែកមួយ នៃផែនការរបស់លោកប្រធានាធិបតី ដូណាល់ ត្រាំ នៅក្នុងការដោះស្រាយអតុល្យភាពពាណិជ្ជកម្ម ហើយនឹងនាំឱ្យសេដ្ឋកិច្ចរបស់ទ្វីបអាស៊ី ប្រឈមមុខនឹងការយកពន្ធដ៏ខ្ពស់បំផុត។

ចាប់ពីថ្ងៃពុធ ទី៩ ខែមេសា ឆ្នាំ២០២៥តទៅ រដ្ឋាភិបាលក្រុងវ៉ាស៊ីនតោន នឹងយកពន្ធគយខ្ពស់ជាងមុន លើសេដ្ឋកិច្ច ជិត៦០ភាគរយ ដែលមានឱនភាពពាណិជ្ជកម្មដ៏ធំបំផុត។

បើតាមការប្រកាសរបស់លោក ដូណាល់ ត្រាំ ប្រធានាធិបតីសហរដ្ឋអាមេរិក អំពីពន្ធដ៏ខ្ពស់បំផុត នៅតំបន់អាស៊ីនោះ រួមមាន៖
១-កម្ពុជា ៖ ៤៩ភាគរយ
២-ឡាវ៖ ៤៨ភាគរយ
៣-វៀតណាម៖ ៤៦ភាគរយ
៤-មីយ៉ាន់ម៉ា៖ ៤៥ភាគរយ
៥-ថៃ ៖៣៧ភាគរយ
៦-ចិន ៖ ៣៤ភាគរយ
៧-ឥណ្ឌូណេស៊ី៖ ៣២ភាគរយ
៨-តៃវ៉ាន់៖ ៣២ភាគរយ
៩-ឥណ្ឌា៖ ២៧ភាគរយ
១០-កូរ៉េខាងត្បូង៖ ២៦ភាគរយ
១១-ប៊្រុយណេ៖ ២៤ភាគរយ
១២-ជប៉ុន៖ ២៤ភាគរយ
១៣-ម៉ាឡេស៊ី ៖២៤ភាគរយ
១៤-ហ្វីលីពីន ៖១៨ភាគរយ

ឱនភាពពាណិជ្ជកម្មរបស់សហរដ្ឋអាមេរិក ជាមួយកម្ពុជា នៅក្នុងឆ្នាំ២០២៤ មានទំហំ១២,៣៤ពាន់លានដុល្លារ ត្រូវបែងចែកដោយទំនិញដែលកម្ពុជា បាននាំចេញទៅកាន់សហរដ្ឋអាមេរិក ក្នុងឆ្នាំដដែលនោះ ចំនួន១២,៦៦ពាន់លានដុល្លារ ដោយបានផ្តល់ប្រហែល០,៩៧។ បើតាមលោកប្រធានាធិបតី ដូណាល់ ត្រាំ គឺប្រទេសកម្ពុជា ត្រូវគិតពន្ធ៩៧ភាគរយ ពីអាមេរិក។ បញ្ហានេះ ហាក់ដូចជាត្រូវបានកាត់បន្ថយពាក់កណ្តាល និង យកពន្ធចំនួន៤៩ភាគរយ លើទំនិញរបស់កម្ពុជា។

កាលពីឆ្នាំ២០២៤ សហរដ្ឋអាមេរិក មានកំណត់ត្រាឱនភាពពាណិជ្ជកម្ម ចំនួន១,២១ ទ្រីលលាន ឬពាន់ពាន់លានដុល្លារអាមេរិក។ ឱនភាពពាណិជ្ជកម្មប្រចាំឆ្នាំសរុបរបស់សហរដ្ឋអាមេរិក លើទំនិញ និងសេវាកម្ម មានចំនួន ៩១៨,៤ពាន់លានដុល្លារ។

ឱនភាពពាណិជ្ជកម្មទំនិញដ៏ធំបំផុតរបស់សហរដ្ឋអាមរិក ជាមួយប្រទេសចិន មានទំហំ២៩៥,៤ ពាន់លានដុល្លារ, សហភាពអឺរ៉ុប មានទំហ២៣៥,៦ពាន់លានដុល្លារ, ម៉ិកស៊ិក មានទំហំ១៧១,៨ ពាន់លានដុល្លារ, វៀតណាម មាន១២៣,៥ ពាន់លានដុល្លារ និង អៀរឡង់ដ៍ មានទំហំ៨៦,៧ ពាន់លានដុល្លារ។

លោកប្រធានាធិបតី ដូណាល់ ត្រាំ បានស្តីបន្ទោសដល់អតុល្យភាពពាណិជ្ជកម្ម ចំពោះការធ្លាក់ចុះ នៃសមត្ថភាពផលិត និង ការងាររបស់សហរដ្ឋអាមេរិក ហើយការធ្វើឱ្យវិស័យការពារជាតិ និង ឧស្សាហកម្មរបស់សហរដ្ឋអាមេរិក ពឹងផ្អែកលើសត្រូវបរទេស។

លោកប្រធានាធិបតី បានថ្លែងចេញពីវាលស្មៅ នៃសេតវិមាន ថា៖«វាជាការប្រកាសឯករាជភាព នៃសេដ្ឋកិច្ចរបស់យើង»។

ជាមួយនឹងការដំឡើងពន្ធដ៏ខ្ពស់បំផុតរបស់លោកប្រធានាធិបតី ដូណាល់ ត្រាំ មកលើទំនិញ នាំចេញពីតំបន់អាស៊ី ចូលទៅកាន់សហរដ្ឋអាមេរិក នោះ បាននាំឲ្យមេដឹកនាំជាច្រើន នៅទ្វីបមួយនេះ បានបង្ហាញ អំពីការព្រួយបារម្ភយ៉ាងខ្លាំង និង ការមិនសប្បាយចិត្ដយ៉ាងខ្លាំង ហើយពួកគេកំពុងតែពិចារណា លើផលប៉ះពាល់ផងដែរ។ ប្រទេសចិន ឥណ្ឌា ជប៉ុន សិង្ហបុរី តៃវ៉ាន់ កូរ៉េខាងត្បូង ថៃ និង វៀតណាម កំពុងតែបញ្ចេញនូវប្រតិកម្មស្រដៀងៗគ្នា បញ្ហាពន្ធរបស់លោកប្រធានាធិបតី ដូណាល់ ត្រាំ ហើយក៏មានផែនការបញ្ជូនក្រុមមន្រ្ដីរបស់ខ្លួនទៅចរចា និង ត្រៀមខ្លួនរួចជាស្រេច សម្រាប់ការឆ្លើបតបតទៅនឹងពន្ធដ៏ខ្ពស់បំផុតនេះផងដែរ៕