ខេត្តកណ្ដាល៖ បុរសកំណាចម្នាក់ មានកម្លាំងពលំមាំមួន មិនព្រមខិតខំប្រឹងប្រែងរកប្រាក់ សម្រាប់ដោះស្រាយបញ្ហាចិញ្ចឹមជីវិតរបស់ខ្លួន បែរជាទៅសុំលុយពីម្ដាយជាមនុស្សចាស់ជរា លុះពេលគាត់គ្មានលុយឲ្យ ក៏ផ្ទុះកំហឹងយ៉ាងក្រេវក្រោធ វាយកម្ទេចទ្រព្យសម្បត្តិ នៅក្នុងផ្ទះ ហើយគំរាមសម្លាប់អ្នកមានគុណរបស់ខ្លួន ទើបសមត្ថកិច្ចបានចុះទៅឃាត់ខ្លួន តាមពាក្យបណ្ដឹងរបស់ជនរងគ្រោះ កាលពីវេលាម៉ោង៩ព្រឹក ថ្ងៃទី២ ខែមេសា ឆ្នាំ២០២៥ នៅភូមិពាមប្រជុំ ឃុំព្រែកអំបិល ស្រុកស្អាង ខេត្តកណ្ដាល។

មន្ត្រីនគរបាលស្រុកស្អាង បានឲ្យដឹង ថា កាលពីវេលាម៉ោង៥ល្ងាច ថ្ងៃទី១ ខែមេសា ឆ្នាំ២០២៥ មានករណីបុរសម្នាក់ បានវាយបំផ្លិចបំផ្លាញទ្រព្យសម្បត្ដិ នៅក្នុងផ្ទះ និង បានគំរាមសម្លាប់ម្ដាយបង្កើតរបស់ខ្លួន នៅភូមិពាមប្រជុំ ឃុំព្រែកអំបិល ស្រុកស្អាង ខេត្តកណ្ដាល។ ដោយសារតែកូនប្រុសបង្កើត តែងតែធ្វើទុក្ខបុកម្នេញ ដល់គាត់ជាម្ដាយខ្លាំងពេក ទើបជនរងគ្រោះ មិនអាចអត់ទ្រាំបាន ហើយបានមកដាក់ពាក្យបណ្ដឹង នៅប៉ុស្ដិ៍នគរបាលរដ្ឋបាល ដើម្បីសុំអន្ដរាគមន៍ពីសមត្ថកិច្ច។

ប្រភពដដែល បានបន្ដ ថា បើតាមពាក្យបណ្ដឹង បានរៀបរាប់ ថា ជនសង័្សយធ្លាប់ជាប់ពន្ធនាគាររបស់ខេត្តកណ្ដាល ចំនួន១លើក មានរយៈពេល១៨ខែ ក្រោមការចោទប្រកាន់ពីបទធ្វើឱ្យខូចខាត ដោយចេតនា និង ប្រើប្រាស់គ្រឿងញៀន។ ជននេះក៏ធ្លាប់ត្រូវបានក្រុមគ្រួសារ នាំទៅកាន់មណ្ឌលកែប្រែបន្សាបគ្រឿងញៀន ចំនួន២លើករួចមកហើយដែរ។ លុះមកដល់វេលាម៉ោង៥ល្ងាច ថ្ងៃទី១ ខែមេសា ឆ្នាំ២០២៥ ជនសង័្សយ គ្រាន់តែបានឃើញម្ដាយ វិលត្រឡប់មកពីលក់ដូរវិញ ក៏សុំលុយចំនួន១០ម៉ឺនរៀល ដើម្បីទៅលោះទូរស័ព្ទរបស់ខ្លួនដែលបានដាក់បញ្ចាំ។ ប៉ុន្ដែម្ដាយអត់មានលុយឲ្យ ទើបធ្វើឲ្យជនសង័្សយផ្ទុះកំហឹងយ៉ាងក្រេវក្រោធឡើង រត់ទៅទាញកាំបិតផ្គាក់ មានដងឫស្សីចំនួនមួយដើម កាប់បំផ្លាញទ្រព្យសម្បត្តិ នៅក្នុងផ្ទះ ធ្វើឲ្យខូចខាតអស់មួយចំនួន និង បានគំរាមសម្លាប់ម្ដាយបង្កើតរបស់ខ្លួន។ លុះមកដល់ព្រឹក ថ្ងៃបន្ទាប់ ជនរងគ្រោះបានមកដាក់ពាក្យបណ្តឹង នៅប៉ុស្តិ៍នគរបាលរដ្ឋបាលព្រែកអំបិល ដើម្បីឲ្យសមត្ថកិច្ចជួយអន្តរាគមន៍។

ប្រភពដដែល បានបន្ថែម ថា បន្ទាប់ពីមានពាក្យបណ្ដឹងបែបនេះ សមត្ថកិច្ចបានចុះទៅស្រាវជ្រាវ និង ឃាត់ខ្លួនជនសង័្សយ ឈ្មោះ លី គឹមស្រ៊ាង អាយុ៤៣ឆ្នាំ មានមុខរបរមិនពិតប្រាកដ។ រីឯជនរងគ្រោះជាម្ដាយ ឈ្មោះ លឹម មួយគាង អាយុ៦៩ឆ្នាំ ជនជាតិខ្មែរ មុខរបរលក់ដូរ។ ពួកគេទាំង២នាក់ម្ដាយនិងកូន មានទីលំនៅភូមិពាមប្រជុំ ឃុំព្រែកអំបិល ស្រុកស្អាង ខេត្តកណ្ដាល។

ក្រោយពេលឃាត់ខ្លួនរួច សមត្ថកិច្ចបានបញ្ជូនជនសង័្សយ ទៅកាន់អធិការដ្ឋាននគរបាលស្រុកស្អាង ដើម្បីសាកសួរ និង កសាងសំណុំរឿងចាត់ការតាមច្បាប់៕