រដ្ឋធានីប៊ែរឡាំង៖ រដ្ឋាភិបាលថ្មីរបស់អាល្លឺម៉ង់ កំពុងតែព្យាយាមចង់ជំរុញដល់សហភាពអឺរ៉ុប ដាក់ទណ្ឌកម្មនានា ប្រឆាំងនឹងប្រទេសជាសមាជិករបស់សហភាពអឺរ៉ុប ចំពោះការខកខានរក្សាតម្លៃ ជាមូលដ្ឋានរបស់ប្លុកសេរីមួយនេះ។ នេះបើតាមសារព័ត៌មានឌីជីថល Tagtik បានចេញផ្សាយ កាលពីព្រឹក ថ្ងៃព្រហស្បតិ៍ ទី៣ ខែមេសា ឆ្នាំ២០២៥។

សារព័ត៌មាន Politico បានរាយការណ៍ ថា ថ្វីបើសេចក្ដីព្រាងច្បាប់របស់រដ្ឋាភិបាលចម្រុះថ្មីរបស់អាល្លឺម៉ង់ មិននិយាយចំឈ្មោះប្រទេសណាមួយ ជាសមាជិករបស់សហភាពអឺរ៉ុបឲ្យបានជាក់លាក់យ៉ាងណាក្ដី តែគេអាចកាត់យល់បាន ថា រដ្ឋាភិបាលក្រុងប៊ែកឡាំង កំពុងតែផ្តោតយ៉ាងខ្លាំង ទៅលើប្រទេសហុងគ្រី ព្រោះតែលោកនាយករដ្ឋមន្រ្ដី វិកទ័រ អ័របាន ជាសម្ពន្ធមិត្តដ៏ជិតស្និទ្ធបំផុតមួយរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅតំបន់អឺរ៉ុប។

រដ្ឋាភិបាលចម្រុះថ្មីរបស់អាល្លឺម៉ង់ ដោយរាប់បញ្ចូលទាំង គណបក្សសហភាពប្រជាធិតេយ្យគ្រីស្ទៀន ហៅកាត់ «CDU» ដែលជាគណបក្សស្ដាំនិយមកណ្ដាលដ៏ធំរបស់ប្រទេសអាល្លឺម៉ង់, គណបក្សសង្គមប្រជាធិតេយ្យ ហៅកាត់«SPD» និង គណបក្សសហភាពសង្គមគ្រីស្ទៀន ហៅកាត់«CSU» កំពុងតែជំរុញដល់សហភាពអឺរ៉ុប ត្រូវតែចាត់វិធានាការយ៉ាងតឹងរឹងបំផុត ប្រឆាំងនឹងប្រទេសណាមួយ ជាសមាជិករបស់ប្លុកសេរីមួយនេះ រំលោភបំពានលើច្បាប់របស់សហភាពអឺរ៉ុប។

ក្រុមអ្នកចរចា មកពីភាគីនានា ត្រូវបានគេសរសេរ នៅក្នុងសេចក្តីរាយការណ៍ ថា៖«ឧបករណ៍ការពារដែលមានស្រាប់ អំពីដំណើរការរំលោភបំពាន និង ការកាត់ទុកមូលនិធិរបស់សហភាពអឺរ៉ុប រហូតដល់ការព្យួរសិទ្ធិសមាជិកភាព ដូចជា សិទ្ធិបោះឆ្នោត នៅក្នុងក្រុមប្រឹក្សាសហភាពអឺរ៉ុប ត្រូវតែអនុវត្តឱ្យបានជាប់លាប់ជាងមុន»។

លោក វិកទ័រ អ័របាន (Viktor Orbán) នាយករដ្ឋមន្រ្ដីហុងគ្រី ជាអ្នកគាំទ្រដ៏ខ្លាំងក្លា ដល់ប្រធានាធិបតីរុស្ស៊ី លោក វ៉្លាឌីមៀ ពូទីន ហើយគាត់ត្រូវបានរងការចោទប្រកាន់ ពីបទបំផ្លាញដល់ឯករាជភាពរបស់តុលាការ ការរឹតត្បិតសេរីភាពសារព័ត៌មាន និង ការលុបបំបាត់បទដ្ឋានលទ្ធិប្រជាធិបតេយ្យ។

រដ្ឋាភិបាលក្រុងប៊ូដាប៉េស្ដ (Budapest) ក្រោមការដឹកនាំរបស់លោកនាយករដ្ឋមន្រ្ដី វិកទ័រ អ័របាន បានអំពាវនាវជាញឹកញាប់ ជំរុញឲ្យមានការបន្ធូរបន្ថយនូវទណ្ឌកម្មរបស់សហភាពអឺរ៉ុប ដែលបានដាក់ទៅលើប្រទេសរុស្ស៊ី អស់រយៈពេលជាង៣ឆ្នាំកន្លងមកនេះ ចាប់តាំងពីរដ្ឋាភិបាលក្រុងមូស្គូ បានលើកទ័ព ចូលលុកលុយ នៅក្នុងប្រទេសអ៊ុយក្រែន ចាប់តាំងពីថ្ងៃទី២៤ ខែកុម្ភៈ ឆ្នាំ២០២២ រហូតមក។ សកម្មភាព នៃរដ្ឋាភិបាលថ្មីរបស់អាល្លឺម៉ង់ អាចជាការប្រថុយប្រថាន នាំឲ្យមានភាពវឹកវរ នៅក្នុងសហភាពអឺរ៉ុប ផងដែរ៕