រាជធានីភ្នំពេញ៖ បុរសស្ដ្រីមួយគូរៀបការជាប្ដីប្រពន្ធ ស្រឡាញញ់គ្នាយ៉ាងល្អូកល្អិន អស់រយៈពេល៣ឆ្នាំ លុះពេលប្ដីបានជួបនឹងគ្រោះអកុសល កើតមានជំងឺ ត្រូវវះកាត់ ចំនួនពីរទៅបីលើក ងាប់សរសៃកម្រើកខ្លួនលែងរួច ដេកស្តូកស្តឹង នៅលើគ្រែ បែរជាប្រពន្ធ ប្រែ ចិត្តលែងសូវរវីរវល់ ហើយបានចេញទៅជួលផ្ទះស្នាក់នៅផ្សេង ហើយនាំមេធាវី មកបង្ខំប្តីឲ្យផ្តិតមេដៃលែងលះគ្នា រហូតធ្វើឲ្យប្តី ឈឺចុកចាប់ស្ទើរក្អួតឈាម គាំងបេះដូងស្លាប់។

បុរសអភ័ព្វ ឈ្មោះធៀម ពុទ្ធី អាយុ៤៤ឆ្នាំ ស្នាក់នៅខុនដូមួយកន្លែង នារាជធានីភ្នំពេញ បានរៀបរាប់ ថា គាត់បាន និងប្រពន្ធ បានរៀបការតាមច្បាប់ត្រឹមត្រូវ និង បានរួមរស់នៅជាមួយគ្នា អស់រយៈពេល៣ឆ្នាំ ប្រកបដោយសេចក្តីសុខសុភមង្គលខ្លាំងណាស់ ហើយស្រលាញ់គ្នាស្ទើរចាក់ទឹកមិនលិច។ ប៉ុន្ដែជាអកុសល នៅក្នុងរយៈពេល៣ខែចុងក្រោយនេះ គាត់បានចាប់ផ្តើមឈឺធ្ងន់ រហូតត្រូវដេកស្ដូកស្ដឹង នៅលើគ្រែ ហើយដើរទៅណាលែងរួច ស្រាប់តែប្រពន្ធរបស់គាត់លែងខ្វល់ខ្វាយនឹងគាត់ ហើយនាងបានចាកចេញពីផ្ទះ ទៅជួលកន្លែងស្នាក់នៅផ្សេង ទុកឱ្យគាត់ឈឺដេកលើគ្រែតែម្នាក់ឯង ក្រោមការមើលថែទាំពីម្តាយបង្កើតទៅវិញ។ លុះមកដល់ថ្ងៃទី២៨ ខែមីនា ឆ្នាំ២០២៥ ស្រាប់តែលេចមុខប្រពន្ធ វិលត្រឡប់មកវិញ ធ្វើឱ្យគាត់រំភើបចិត្តយ៉ាងខ្លាំង។ ប៉ុន្ដែការរំភើបនេះ មិនបានប៉ុន្មានផង បែរជាមានរឿងដ៏គួរឲ្យឈឺចិត្ដបំផុត គឺប្រពន្ធនាំមេធាវីមកបង្ខំឱ្យគាត់ជាប្តីផ្តិតមេដៃលែងលះគ្នាឱ្យដាច់ស្រេចទៅវិញ ធ្វើឱ្យគាត់ឈឺចិត្តស្អិតទ្រូង ស្ទើរគាំងបេះដូងស្លាប់។

លោក ធៀម ពុទ្ធី បានបន្ត ថា ប្រពន្ធរបស់គាត់ បានប្រាប់ថា បើចង់ឱ្យនាងមើលថែតទៅទៀត ទាល់តែផ្តិតមេដៃលែងលះគ្នា ដើម្បីនាងមានសេរីភាព ធ្វើអ្វីតាមច្បាប់ ហើយនាងនឹងរកពេលមកមើលថែ។ ប៉ុន្តែគាត់មិនបានផ្តិតមេដៃឱ្យនោះទេ ព្រោះគាត់គ្មានកំហុស ដែលត្រូវលែងលះគ្នា ហើយគួរណាស់ប្រពន្ធអាណិតប្តីដែលកំពុងមានជំងឺធ្ងន់ ដេកដួលតែមួយកន្លែងបែបនេះ មិនមែននាំមេធាវី មកបង្ខំឱ្យគាត់ផ្តិតមេដៃលែងលះគ្នា។ លុះមកពេលប្រពន្ធចេះតែបណ្តេញ ណាមួយគ្មានអ្នកមើលថែដិតដល់ផង ទើបម្តាយរបស់គាត់ បាននាំគាត់មកស្នាក់នៅផ្ទះប្អូនប្រុស នៅខេត្តកណ្តាល ក្រោមការមើលថែពីម្តាយវ័យ ចំណាស់ ដែលកំពុងមានជំងឺប្រចាំកាយ។

ស្ត្រីចំណាស់ ឈ្មោះ លុក អន អាយុជាង៧០ឆ្នាំ ត្រូវជាម្តាយបង្កើតរបស់លោក ធៀម ពុទ្ធី បានអះអាង ថា កូនប្រុសរបស់គាត់ និងប្រពន្ធ បានរៀបការ អស់រយៈពេល ៣ឆ្នាំមកហើយ ហើយតាំងពីចាប់ដៃគ្នាមក គាត់ជាម្តាយសង្កេតឃើញ ថា ពួកគេស្រលាញ់គ្នាខ្លាំងណាស់។ ប៉ុន្ដែរយៈពេលប៉ុន្មានខែចុងក្រោយនេះ កូនប្រុសគាត់បានចាប់ផ្តើមធ្លាក់ខ្លួនឈឺ រហូតត្រូវវះកាត់ ម្តងជាពីរដង តែអាការជំងឺរបស់កូនប្រុស ហាក់មិនបានធូរស្រាលសោះឡើង ហើយត្រូវដេកដួលនៅលើគ្រែដើរលែងរួច ទើបកូនប្រុសបានហៅឱ្យគាត់ជាម្តាយ មកជួយមើលថែគេ នៅពេលយប់។ នៅក្នុងអំឡុងពេលគាត់ចូលមកមើលថែកូនប្រុសនោះ ប្តីប្រពន្ធរបស់ពួកគេចេះតែកើតរឿងរកាំរកូស ទាស់សម្តីគ្នាមិនឈប់ រហូតឈានដល់កូនប្រសាស្រី បានស្តីបណ្តេញកូនប្រុសរបស់គាត់ ដែលកំពុងតែមានជំងឺ ឱ្យចេញពីខុនដូ។ លុះមកដល់ថ្ងៃទី២៨ ខែមីនា ឆ្នាំ២០២៥ គាត់ជាម្តាយទ្រាំមិនបាន ក៏នាំកូនប្រុស ឈ្មោះធៀម ពុទ្ធី មកសុំផ្ទះកូនប្រុសរបស់គាត់ម្នាក់ទៀត នៅក្នុងខេត្តកណ្តាល ដើម្បីសម្រាកព្យាបាលបន្ត។ លុះមកដល់រសៀល ថ្ងៃដដែលនេះ កូនប្រសាស្រីរបស់គាត់ បានចុចទូរស័ព្ទមកប្រាប់គាត់ ជាម្តាយក្មេក ថា នាងនឹងនាំមេធាវីមកផ្តិតមេដៃលែងលះជាមួយប្តី ដែលជាកូនប្រុសគាត់ ធ្វើឱ្យគាត់ស្រឡាំងកាំង រកពាក្យអ្វីហាស្តីលែងចេញ។

ទោះជាយ៉ាងណាក៏ដោយ ពាក់ព័ន្ធនឹងការលើកឡើងទាំងនេះ សារព័ត៌មានរបស់យើងខ្ញុំ មិនអាចទាក់ទងសុំការបំភ្លឺពីស្រ្ដីជាប្រពន្ធបាននោះឡើយ។ យើងរង់ចាំទទួលការបកស្រាយបំភ្លឺបន្ថែមទៀត មកពីគ្រប់ភាគីពាក់ព័ន្ធទាំងអស់៕