រដ្ឋធានីវ៉ាស៊ីនតោន៖ ទោះជាកាលពីប៉ុន្មានសប្ដាហ៍មុន ប្រធានាធិបតីសហរដ្ឋអាមេរិក បានទាមទារឲ្យមានការបោះឆ្នោតជាថ្មី នៅអ៊ុយក្រែន ហើយបានហៅលោក ហ្សេឡែនស្គី ជាមេដឹកនាំផ្ដាច់ការ យ៉ាងណាក្ដី ប៉ុន្ដែឥឡូវ លោក ដូណាល់ ត្រាំ បាននិយាយទាំងកំហឹង គំរាមយកពន្ធ រហូតដល់៥០ភាគរយ ទៅលើប្រទេសណាមួយទិញប្រេងរបស់រុស្ស៊ី ព្រោះតែម្ចាស់សេតវិមានរូបនេះ បានផ្ទុះកំហឹងយ៉ាងខ្លាំង ចំពោះការធ្វើអត្ថាធិប្បាយរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន បានមើលងាយទៅដល់សមភាគីអ៊ុយក្រែនរបស់គាត់។។

ទីភ្នាក់ងារសារព័ត៌មានរបស់អង់គ្លេស Reuters បានចេញផ្សាយ កាលពីថ្ងៃចន្ទ ទី៣១ ខែមីនា ឆ្នាំ២០២៥ ថា បើតាមបទសម្ភាសន៍មួយរបស់ទូរទស្សន៍អាមេរិក NBC News លោក ដូណាល់ ត្រាំ (Donald Trump) ប្រធានាធិបតីសហរដ្ឋអាមេរិក បានគំរាមយកពន្ធរហូតដល់៥០ភាគរយ លើប្រេងរបស់រុស្ស៊ី ប្រសិនបើមិនមានបទឈប់បាញ់ នៅអ៊ុយក្រែន។ ទន្ទឹមគ្នានេះដែរ លោកប្រធានាធិបតី ត្រាំ បានរិះគន់យ៉ាងខ្លាំង ដល់ការធ្វើអត្ថាធិប្បាយរបស់ប្រធានាធិបតីរុស្ស៊ី លោក វ៉្លាឌីមៀ ពូទីន ជុំវិញការមើលងាយដល់ភាពជាមេដឹកនាំរបស់ប្រធានាធិបតីអ៊ុយក្រែន លោក ហ្សេឡែនស្គី។

លោក ដូណាល់ ត្រាំ (Donald Trump) ប្រធានាធិបតីសហរដ្ឋអាមេររិក កាលពីថ្ងៃអាទិត្យ ទី៣០ ខែមីនា បានបញ្ជាក់ ថា លោកពិតជាមានការខឹងសម្បាយ៉ាងខ្លាំង ចំពោះប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin) ហើយលោកនឹងដាក់ពន្ធបន្ទាប់បន្សំ ចន្លោះពី២៥ទៅ៥០ភាគយ លើប្រទេស ឬ ក្រុមហ៊ុនណាមួយទិញប្រេងរបស់រុស្ស៊ី ប្រសិនបើលោកមានអារម្មណ៍ ថា រដ្ឋាភិបាលក្រុងម៉ូស្គូ កំពុងតែរារាំងដល់កិច្ចខិតខំប្រឹងប្រែងរបស់លោក នៅក្នុងការបញ្ចប់សង្គ្រាម នៅអ៊ុយក្រែន។

លោកប្រធានាធិបតី ដូណាល់ ត្រាំ បានប្រាប់ដល់ទូរទស្សន៍របស់អាមេរិក NBC News ថា លោកមានការខឹងសម្បាយ៉ាងខ្លាំង បន្ទាប់ពីមេដឹកនាំវិមានក្រឹមឡាំង លោក វ៉្លាឌីមៀ ពូទីន កាលពីសប្តាហ៍មុន បានរិះគន់ អំពីភាពជឿជាក់ និង ភាពមិនស្របច្បាប់ នៃការដឹកនាំរបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskiy)។ នេះបើតាមទូរទស្សន៍ដដែលនេះ បានដកស្រង់សម្ដី ពីកិច្ចសម្ភាសន៍តាមទូរស័ព្ទ កាលពីព្រឹក ថ្ងៃអាទិត្យ ទី៣០ ខែមីនា។

ចាប់តាំងពីការចូលកាន់តំណែងជាលើកទី២ កាលពីថ្ងៃទី២០ ខែមករា ឆ្នាំ២០២៥ រហូតមក លោកប្រធានាធិបតី ដូណាល់ ត្រាំ បានប្រកាន់នូវគោលជំហរផ្សះផ្សាបន្ថែមទៀត ជាមួយនឹងប្រទេសរុស្ស៊ី រហូតធ្វើឱ្យសម្ពន្ធមិត្តលោកខាងលិច ជាពិសេស ប្រទេសមហាអំណាច នៅអឺរ៉ុប រួមមាន៖ ចក្រភពអង់គ្លេស និង បារាំង មានការប្រុងប្រយ័ត្ន និង ព្រួយបារម្ភយ៉ាងខ្លាំង ខណៈលោកប្រធានាធិបតី ត្រាំ កំពុងតែព្យាយាម ធ្វើជាអ្នកសម្របសម្រួល សម្រាប់ការបញ្ចប់សង្គ្រាមរបស់ក្រុងម៉ូស្គូ នៅអ៊ុយក្រែន រយៈពេលជាង៣ឆ្នាំកន្លងមកនេះ។

ការអត្ថាធិប្បាយដ៏មុតស្រួចរបស់លោកប្រធានាធិបតី ដូណាល់ ត្រាំ អំពីសមភាគីរុស្ស៊ី លោក វ៉្លាឌីមៀ ពូទីន កាលពីថ្ងៃអាទិត្យ ទី៣០ ខែមីនា បានឆ្លុះបញ្ចាំង អំពីការខកចិត្តរបស់លោកប្រធានាធិបតី កាន់តែខ្លាំងឡើង អំពីការខ្វះសកម្មភាពលើបទឈប់បាញ់ នៅអ៊ុយក្រែន។

លោកប្រធានាធិបតី ដូណាល់ ត្រាំ បានសង្កត់ធ្ងន់ទៀត ថា៖« ប្រសិនបើរុស្ស៊ី និង ខ្ញុំ មិនអាចធ្វើកិច្ចព្រមព្រៀង ស្តីពីការបញ្ចប់នូវការបង្ហូរឈាម នៅអ៊ុយក្រែន បាន ហើយប្រសិនបើខ្ញុំគិត ថា ការបង្ហូរឈាមនេះ ជាកំហុសរបស់រុស្ស៊ី ... ខ្ញុំនឹងដាក់ពន្ធបន្ទាប់បន្សំលើប្រេង និង លើប្រេងទាំងអស់ ដែលនាំចេញពីប្រទេសរុស្ស៊ី។ បញ្ហាទាំងនោះ អាចថា ប្រសិនបើអ្នកទិញប្រេងរបស់រុស្ស៊ី អ្នកមិនអាចធ្វើអាជីវកម្ម នៅសហរដ្ឋអាមេរិក បានឡើយ។ សហរដ្ឋអាមេរិក នឹងយកពន្ធ២៥ភាគរយលើប្រេងទាំងអស់ ឬយកពន្ធចន្លោះពី២៥ទៅ៥០ភាគយ លើប្រេងទាំងអស់របស់រុស្ស៊ី។

ក្រោយមកលោកប្រធានាធិបតី ដូណាល់ ត្រាំ បាននិយាយសាជាថ្មី ទៅកាន់ក្រុមអ្នកសារព័ត៌មាន ថា លោកមានការខកចិត្តយ៉ាងខ្លាំង ចំពោះលោក វ៉្លាឌីមៀ ពូទីន ប្រធានាធិបតីរុស្ស៊ី។ ជាមួយគ្នានេះដែរ លោកប្រធានាធិបតី ត្រាំ បានសង្កត់ធ្ងន់ទៀត ថា៖«ខ្ញុំគិតថា យើងកំពុងតែធ្វើឱ្យមានការរីកចម្រើន ពីមួយជំហានទៅមួយជំហាន។ ខ្ញុំអាចនឹងដាក់វិធានការជាថ្មី លើពាណិជ្ជកម្ម នៅក្នុងរយៈពេលមួយខែ។

លោកប្រធានាធិបតី ដូណាល់ ត្រាំ បានផ្តោតយ៉ាងខ្លាំង លើការបញ្ចប់នូវអ្វីដែលលោកប្រធានាធិបតី បានហៅជា«សង្រ្គាមដ៏គួរឱ្យអស់សំណើច និង គ្មានន័យ» ដែលរុស្ស៊ី បានចាប់ផ្តើមឈ្លានពានទ្រង់ទ្រាយធំ ទៅលើប្រទេសអ៊ុយក្រែន ចាប់តាំងពីថ្ងៃទី២៤ ខែកុម្ភៈ ឆ្នាំ២០២២។ សង្គ្រាមអស់រយៈពេលជាង៣ឆ្នាំកន្លងមកនេះ បានធ្វើឲ្យរុស្ស៊ី មានការរីកចម្រើនតិចតួចណាស់។

ការផ្ទុះកំហឹងរបស់លោកប្រធានាធិបតី ដូណាល់ ត្រាំ បានកើតឡើង ក្រោយពេលលោក វ៉្លាឌីមៀ ពូទីន មេដឹកនាំរុស្ស៊ី កាលពីថ្ងៃសុក្រ ទី២៨ ខែមីនា បានស្នើឱ្យអ៊ុយក្រែន អាចត្រូវដាក់ឲ្យស្ថិតនៅក្រោមទម្រង់ នៃរដ្ឋបាលបណ្តោះអាសន្ន ដើម្បីអនុញ្ញាតឱ្យមានការបោះឆ្នោតជាថ្មី។ គោលបំណងដ៏សំខាន់របស់លោកប្រធានាធិបតី ពូទីន ចង់រុញច្រានប្រធានាធិបតីអ៊ុយក្រែន លោក ហ្សេឡែនស្គី ឲ្យខ្ទាតចេញពីតំណែង។

លោក ដូណាល់ ត្រាំ ខ្លួនឯង កាលពីពេលកន្លងទៅនេះ ធ្លាប់អំពាវនាវឱ្យមានការបោះឆ្នោតជាថ្មី នៅក្នុងប្រទេសអ៊ុយក្រែន និង បានបរិហារទៅលើលោកប្រធានាធិបតី ហ្សេឡែនស្គី ថា ជាជនផ្តាច់ការ ហើយនិយាយ ថា លោកពូទីន ដឹងថា គាត់ខឹងនឹងលោក។ ប៉ុន្តែលោកប្រធានាធិបតី ត្រាំ បានបន្ថែមថា លោកនឹងមានទំនាក់ទំនងល្អជាមួយពូទីន ហើយកំហឹងនេះនឹងរលាយបាត់យ៉ាងឆាប់រហ័ស ... ប្រសិនបើលោក ពូទីន ធ្វើរឿងត្រឹមត្រូវ។

លោកប្រធានាធិបតី ហ្សេឡែនស្គី បានបញ្ជាក់ កាលពីពេលកន្លងទៅនេះ ថា៖« ខ្ញុំបានត្រៀមខ្លួនរួចរាល់អស់ហើយ សម្រាប់ការលាលែងចេញពីតំណែង ប្រសិនបើប្រទេសរបស់ខ្ញុំ ទទួលបានសន្ដិភាព និង បានចូលជាសមាជិករបស់អង្គការណាតូ»៕