រាជធានីភ្នំពេញ៖ ជនទំនើងមួយក្រុម បានកាប់ប្រហារទៅលើជនរងគ្រោះម្នាក់ បណ្ដាលឲ្យរងរបួស ហើយត្រូវបានសមត្ថកិច្ចឃាត់ខ្លួន កាលពីវេលាម៉ោង១០យប់ ថ្ងៃទី១១ ខែវិច្ឆិកា ឆ្នាំ២០២ នៅភូមិ២២ សង្កាត់ស្រះចក ខណ្ឌដូនពេញ រាជធានីភ្នំពេញ ហើយបានកសាងសំណុំរឿង បញ្ជូនទៅកាន់តុលាការ។

បើតាមរបាយការណ៍របស់សមត្ថកិច្ច បានឲ្យដឹង ថា កាលពីវេលាម៉ោង១០ និង ៣០នាទីយប់ ថ្ងៃទី៤ ខែវិច្ឆិកា ឆ្នាំ២០២៤ ជនរងគ្រោះ និង បក្ខពួកចំនួន៣នាក់ផ្សេងទៀត បានអង្គុយនៅហាងកាហ្វេអេសខេ តាមផ្លូវបេតុង ស្ថិតក្នុងភូមិមិត្តភាព សង្កាត់ឫស្សីកែវ ខណ្ឌឫស្សីកែវ ដោយរង់ចាំមិត្តភក្តិម្នាក់ទៀត ដែលជូនសង្សាររបស់គេទៅផ្ទះ។ ប៉ុន្ដែនៅពេលនោះ ស្រាប់តែលេចមុខជនទំនើងចំនួន៧នាក់មិនស្គាល់អត្តសញ្ញាណ ប្រដាប់ដោយដាវកែច្នៃ បានជិះម៉ូតូ៤គ្រឿង ម៉ាកហុងដាឌ្រីម និង ម៉ាកស៊ុយហ្ស៊ុយគីនិច មិនចាំស្លាកលេខ ចូលមកកាប់ប្រហារទៅលើជនរងគ្រោះ បណ្តាលឲ្យជនរងគ្រោះរងរបួសដៃជាច្រើនកន្លែង ហើយបាននាំគ្នាជិះម៉ូតូគេចខ្លួនបាត់អស់។ រីឯជនរងគ្រោះត្រូវមិត្តភក្តិ បញ្ជូនទៅសង្គ្រោះ នៅមន្ទីរពេទ្យកាល់ម៉ែត។

ប្រភពដដែល បានបន្ដ ថា ក្រោយពេលមានហេតុការណ៍ហិង្សាបែបនេះ សមត្ថកិច្ចជំនាញបានស្រាវជ្រាវ រហូតកំណត់បានអត្តសញ្ញាណរបស់ជនសង័្សយ។ លុះមកដល់វេលាម៉ោង១០យប់ ថ្ងៃទី១១ ខែវិច្ឆិកា ឆ្នាំ២០២៤ សមត្ថកិច្ចបានចុះទៅឃាត់ខ្លួនជនសង័្សយចំនួន៥នាក់ នៅភូមិ២២ សង្កាត់ស្រះចក ខណ្ឌដូនពេញ។ ជនសង័្សយទាំងនេះ រួមមាន៖

១-ឈ្មោះ វ៉ាន់ ណាវីត ហៅក្រៅ ប៊ី ភេទប្រុស អាយុ ១៧ឆ្នាំ មុខរបរគ្មាន មានទីលំនៅផ្ទះជួល ភូមិ២២ សង្កាត់ស្រះចក ខណ្ឌដូនពេញ រាជធានីភ្នំពេញ។

២-ឈ្មោះ មួន ខេមរា ភេទប្រុស អាយុ ១៧ឆ្នាំ មុខរបរគ្មាន មានទីលំនៅផ្ទះលេខ១៧០ ផ្លូវលេខ៨៦ ភូមិ២២ សង្កាត់ស្រះចក ខណ្ឌដូនពេញ រាជធានីភ្នំពេញ។

៣-ឈ្មោះ រឿង វីរៈ ភេទប្រុស អាយុ១៧ឆ្នាំ មុខរបរនៅផ្ទះ មានទីលំនៅភូមិ២២ សង្កាត់ស្រះចក ខណ្ឌដូនពេញ រាជធានីភ្នំពេញ ។

៤-ឈ្មោះ ណាង វណ្ណៈ ភេទប្រុស អាយុ១៩ឆ្នាំ មុខរបរដឹកជញ្ជូន មានទីលំនៅភូមិ១៥ សង្កាត់ស្រះចក ខណ្ឌដូនពេញ រាជធានីភ្នំពេញ។

៥-ឈ្មោះ ជួន ឌីម៉ូ ភេទប្រុស អាយុ ១៧ឆ្នាំ មុខរបរ សិស្ស មានទីលំនៅសង្កាត់ដង្កោ ខណ្ឌដង្កោ រាជធានីភ្នំពេញ។

ក្រោយពេលឃាត់ខ្លួនរួចមក មន្រ្ដីជំនាញការិយាល័យព្រហ្មទណ្ឌកម្រិតស្រាលរាជធានីភ្នំពេញ បានកសាងសំណុំរឿង បញ្ជូនជនសង័្សយទាំង៥នាក់ ទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់៕