រាជធានីភ្នំពេញ៖ យុវជនប្រុស-ស្រី ចំនួន៣នាក់ បានជិះម៉ូតូមួយគឿងដឹកគ្នា បោះពួយយ៉ាងលឿន ចាប់ហ្វ្រាំងមិនទាន់ ជ្រុលចង្កូតទៅបុករថយន្ដយ៉ាងពេញទំហឹង ដួលដេករដូករណែល នៅលើថ្នល់ បណ្ដាលឲ្យរងរបួសធ្ងន់ ចំនួន២នាក់ និង អ្នកបើកបរ បានបាត់បង់ជីវិតយ៉ាងអាណោចអាធ័ម កាលពីវេលាម៉ោង១២ និង ២នាទីរំលងអធ្រាត្រ ឈានចូលថ្ងៃទី១២ ខែវិច្ឆិកា ឆ្នាំ២០២៤ នៅត្រង់ចំណុចស្ដុបយុគន្ធរ កែងគ្នារវាងមហាវិថីព្រះសីហនុ និង ផ្លូវលេខ១០៥ ស្ថិតក្នុងសង្កាត់បឹងកេងកង ខណ្ឌបឹងកេងកង រាជធានីភ្នំពេញ។

ប្រភពព័ត៌មាន បានឲ្យដឹង ថា នៅមុនពេលកើតមានគ្រោះថ្នាក់ចរាចរណ៍ដ៏រន្ធត់នោះ មានយុវជនម្នាក់ មានអាយុប្រហែលជា១៧ឆ្នាំ បានបើកម៉ូតូ ម៉ាកហុងដាឌ្រីម សេ១២៥ ស៊េរី២០២៤ ពាក់ស្លាកលេខ កំពង់ធំ 1T-0084 ដឹកមិត្តភក្ដិប្រុសស្រីក្មេងៗដូចគ្នាចំនួន២នាក់ បោះពួយយ៉ាងលឿន តាមបណ្ដោយមហាវិថីព្រះសីហនុ នៅក្នុងទិសដៅពីលិចទៅកើត។ ស្របគ្នានោះដែរ ក៏មានរថយន្ដមួយគ្រឿង ម៉ាកព្រូស មិនចាំស៊េរី និង ស្លាកលេខ បើកបរ នៅក្នុងទិសដៅពីជើងទៅត្បូង។ លុះពេលរថយន្ដ បានបើកមកដល់ត្រង់ចំណុចផ្លូវប្រសព្វគ្នា ក៏បត់ឡើងទៅតាមផ្លូវព្រះសីហនុ ស្រាប់តែម៉ូតូ បានបោះពួយ ជ្រុលទៅបុករថយន្ដយ៉ាងពេញទំហឹង ដួលបោកទៅលើថ្នល់ បណ្ដាលឲ្យនារីម្នាក់បាក់ជើង និង យុជនម្នាក់ទៀតរងរបួសធ្ងន់ ខណៈអ្នកបើកម៉ូតូ បានស្លាប់ភ្លាមៗ នៅនឹងកន្លែងកើតហេតុ។

ក្រោយពេលកើតហេតុ សមត្ថកិច្ចបានចុះទៅពិនិត្យ និង ស្រាវជ្រាវស្វែងរកក្រុមគ្រួសារ មកទទួលយកសពរបស់ជនរងគ្រោះ ដឹកយកទៅរៀបចំធ្វើបុណ្យតាមប្រពៃណី។ ដោយឡែក អ្នករងរបួសទាំង២នាក់ ត្រូវបានគេបញ្ជូនទៅសង្គ្រោះ នៅក្នុងមន្ទីរពេទ្យ៕