រាជធានីភ្នំពេញ៖ នៅក្នុងអំឡុងចូលឆ្នាំថ្មីប្រពៃណីជាតិខ្មែរនាពេលខាងមុខនេះ រដ្ឋបាលរាជធានីភ្នំពេញ នឹងរៀបចំសង្ក្រាន្តវត្ដភ្នំ រយៈពេល៣ថ្ងៃ នៅរមណីយដ្ឋានប្រវត្ដិសាស្រ្ដវត្ដភ្នំ និង ផ្លូវថ្មើរជើង (Walk Street) សម្រាប់បង្កើតបរិយាកាសកម្សាន្ដសប្បាយ ជូនដល់ប្រជាពលរដ្ឋរស់នៅក្នុងរាជធានី ក៏ដូចជា ភ្ញៀវទេសចរជាតិ និងអន្ដរជាតិ ផងដែរ។

កម្មវិធីសង្ក្រាន្តវត្តភ្នំ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ នឹងត្រូវរៀបចំឡើង រយៈពេល៣ថ្ងៃ ចាប់ពីថ្ងៃទី១៤-១៦ ខែមេសា ឆ្នាំ២០២៥ ហើយនឹងបើកដំណើរការផ្លូវថ្មើរជើង (Walk Street) រយៈពេល៥ថ្ងៃ ចាប់ពីថ្ងៃទី១២-១៦ ខែមេសា ឆ្នាំ២០២៥។

ជាមួយគ្នានេះ រដ្ឋបាលរាជធានីភ្នំពេញ សូមប្រកាសជាជូនដំណឹង និង ជម្រាបជូនដល់បងប្អូនប្រជាពលរដ្ឋទាំងអស់ មេត្តានាំគ្នាមកចូលរួមអបអរសាទរ នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ សប្តស័កព.ស២៥៦៩ គ.ស.២០២៥ ឲ្យបានច្រើនកុះករ ដើម្បីញ៉ាំងឱ្យពិធីបុណ្យជាតិដ៏ធំមួយនេះ ប្រព្រឹត្តទៅប្រកបដោយអធិកអធម រក្សាបាននូវទំនៀមទម្លាប់ប្រពៃណី វប្បធម៌ដ៏ល្អផូរផង់របស់ជាតិ ហើយបង្កើតបរិយាកាសកម្សាន្ដសប្បាយរីករាយទាំងអស់គ្នា។ លើសពីនេះទៀត ពិធីបុណ្យចូលឆ្នាំថ្មីប្រពៃណីជាតិនេះ ក៏មានគោលបំណងលើកកម្ពស់ដល់កិត្យានុភាពជាតិ និង ទាក់ទាញភ្ញៀវទេសចរជាតិ-អន្តរជាតិ ឲ្យមកចូលរួមកម្សាន្តសប្បាយ នៅរាជធានីភ្នំពេញ ដែលជាបេះដូងរបស់ប្រទេសកម្ពុជា ផងដែរ។

រដ្ឋបាលរាជធានីភ្នំពេញ នឹងរៀបចំព្រឹត្តិការណ៍សង្ក្រាន្តវត្តភ្នំ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ មានរយៈពេល៣ថ្ងៃ ចាប់ពីថ្ងៃទី១៤-១៦ ខែមេសា ឆ្នាំ២០២៥ វេលាម៉ោង ៨:០០នាទីព្រឹក ដល់ម៉ោង ២០:០០នាទីយប់ អមដោយការរៀបចំកម្មវិធីបែបប្រពៃណីជាតិ និង កម្មវិធីកម្សាន្តសប្បាយជាច្រើន មានដូចជា៖ ពិធីទទួលទេវតាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងសិល្បៈរបាំប្រពៃណី លេងល្បែងប្រជាប្រិយជាតិ ប្រគំតន្ត្រីបុរាណ-សម័យ រាំលេងកម្សាន្ត ការតាំងបង្ហាញម្កុដអប្សរា-ពិណខ្នាតធំ និង ការតាំងបង្ហាញផលិតផលខ្មែរ។

ស្របគ្នានេះដែរ អាជ្ញាធររាជធានីភ្នំពេញ នឹងបើកដំណើរការផ្លូវថ្មើរជើង (Walk Street) រយៈពេល៥ថ្ងៃ ចាប់ពីថ្ងៃទី១២-១៦ ខែមេសា ឆ្នាំ២០២៥ នៅតាមបណ្តោយតីរវិថីព្រះស៊ីសុវត្ថិ ចាប់ពីមុខព្រះបរមរាជវាំង រហូតដល់រមណីយដ្ឋានវប្បធម៌ប្រវត្តិសាស្ត្រវត្តភ្នំ៕