រាជធានីតូក្យូ៖ ក្រោយពេលគ្រោះរញ្ជួយដីដ៏មានកម្លាំងខ្លាំង រហូតដល់៧,៧រ៉ិចទ័រ បានវាយប្រហារទៅលើប្រទេសមីយ៉ាន់ម៉ា កាលពីថ្ងៃសុក្រ ទី២៨ ខែមីនា ឆ្នាំ២០២៥ ដោយបានសម្លាប់មនុស្សយ៉ាងតិច ២ ៧១៩នាក់ និង រងរបួស ចំនួន ៤ ៥២១នាក់ ខណៈមនុស្ស៤៤១នាក់ផ្សេងទៀត កំពុងតែបាត់ខ្លួននោះមក រដ្ឋាភិបាលក្រុងតូក្យូ បានព្យាករ អំពីគ្រោះរញ្ជួយដីដ៏មានកម្លាំងខ្លាំង ចន្លោះពី៨ទៅ៩រ៉ិចទ័រ ហើយគ្រោះធម្មជាតិដ៏កំណាចមួយនេះ អាចនឹងសម្លាប់មនុស្ស រហូតដល់ប្រហែលជាង៣០ម៉ឺននាក់ និង បំផ្លាញសេដ្ឋកិច្ចរបស់ជប៉ុន រហូតដល់១,៨១ទ្រីលលាន ឬពាន់ពាន់លានដុល្លារអាមេរិក (Trillion)

ទីភ្នាក់ងារសារព័ត៌មានរបស់អង់គ្លេស Reuters បានចេញផ្សាយ កាលពីថ្ងៃអង្គារ ទី១ ខែមេសា ឆ្នាំ២០២៥ ថា រដ្ឋាភិបាលក្រុងតូក្យូ បានបញ្ជាក់ នៅក្នុងរបាយការណ៍របស់ខ្លួន កាលពីថ្ងៃចន្ទ ទី៣១ ខែមីនា ឆ្នាំ២០២៥ ថា សេដ្ឋកិច្ចរបស់ប្រទេសជប៉ុន អាចនឹងត្រូវបំផ្លិចបំផ្លាញ រហូតដល់១,៨១ទ្រីលលាន ឬពាន់ពាន់លានដុល្លារអាមេរិក នៅក្នុងឧបទ្ទវហេតុគ្រោះរញ្ជួយដីដ៏មានកម្រិតខ្លាំងក្លាបំផុត រហូតដល់៨រ៉ិចទ័រ ដែលត្រូវបានក្រុមអ្នកជំនាញព្យាករ អស់រយៈពេលជាយូរមកហើយ។ មហាគ្រោះរញ្ជួយដីនេះ អាចនឹងវាយប្រហារ មកលើឆ្នេរសមុទ្រប៉ាស៊ីហ្វិករបស់ប្រទេសជប៉ុន ហើយគ្រោះធម្មជាតិដ៏កំណាចមួយនេះ អាចបង្កឱ្យមានរលកយក្សស៊ូណាមិ បាក់ដួលរលំអគាររាប់រយកន្លែង និង អាចសម្លាប់មនុស្ស ប្រហែលជាង ៣00 000នាក់។

បើតាមរបាយការណ៍របស់ខុទ្ទកាល័យ នៃគណៈរដ្ឋមន្រ្ដីជប៉ុន បានឲ្យដឹង ថា ការខូចខាតមកលើសេដ្ឋកិច្ចរបស់ប្រទេសជប៉ុន ដែលត្រូវបានក្រុមអ្នកជំនាញព្យាករ ថា នឹងមានទំហំ ២៧០,៣ពាន់ពាន់លានយ៉េន ឬជិតពាក់កណ្តាល នៃផលិតផលក្នុងស្រុកសរុប ឬ GDP របស់ប្រទេសអាស៊ីបូព៌ាមួយនេះ។ តួលេខព្យាករណ៍ពីទំហំខូចខាត មកលើសេដ្ឋកិច្ចរបស់ប្រទេសជប៉ុន បង្កឡើងដោយមហាគ្រោះរញ្ជួយដី គឺកើនឡើងយ៉ាងខ្លាំង លើសពីការប៉ាន់ប្រមាណ កាលពីមុន ដោយមានត្រឹមតែចំនួន២១៤,២ពាន់ពាន់លានយ៉េន។ ការប៉ាន់ប្រមាណថ្មី អំពីទំហំខូចខាតដល់សេដ្ឋកិច្ចរបស់ជប៉ុន បានគិតអំពីសម្ពាធអតិផរណា និង ទិន្នន័យ នៃផែនដីដែលបានធ្វើបច្ចុប្បន្នភាព ត្រូវបានពង្រីកទៅលើតំបន់ទឹកជំនន់ ដែលត្រូវបានក្រុមអ្នកជំនាញព្យាករ។

ជប៉ុន ជាប្រទេសមួយស្ថិតក្នុងចំណោមប្រទេសងាយរងគ្រោះ ដោយសារគ្រោះរញ្ជួយដីដ៏ធំបំផុតរបស់ពិភពលោក។ រដ្ឋាភិបាលជប៉ុន បានមើលឃើញ ថា មានឱកាសប្រហែល៨០ភាគរយ នៃគ្រោះរញ្ជួយដីកម្រិតខ្លាំងបំផុត ចន្លោះពី៨ទៅ៩រ៉ិចទ័រ នៅតាមតំបន់សមុទ្រ ដែលគេស្គាល់ ថា ជា Nankai Trough (ណាន់កៃ ទ្រួក)៕