រាជធានីភ្នំពេញ៖ គ្រោះរញ្ជួយដីដ៏មានកម្លាំងខ្លាំង រហូតដល់កម្រិត៧,៧រ៉ិចទ័រ បានវាយប្រហារបំផ្លិចបំផ្លាញ ទៅលើប្រទេសមីយ៉ាន់ម៉ា និង ថៃ កាលពីថ្ងៃសុក្រ ទី២៨ ខែមីនា ឆ្នាំ២០២៥ ដោយបានសម្លាប់មនុស្ស និង បង្កឲ្យមានអ្នករងរបួសរាប់ពាន់នាក់ ហើយក្នុងនោះក៏មានពលករខ្មែរម្នាក់បានស្លាប់ និង ម្នាក់ទៀត បានរងរបួសផងដែរ។

ជាមួយនឹងការយកចិត្តទុកដាក់លើសុខទុក្ខរបស់ប្រជាជាតិខ្មែរ ដែលកំពុងតែបំពេញការងារ នៅក្រៅប្រទេស ហើយបានជួបនឹងគ្រោះថ្នាក់នោះ សម្ដេចធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា និង លោកស្រីបណ្ឌិត បានឧបត្ថម្ភថវិកា ចំនួន១០លានរៀល ជូនដល់ពលការិនីម្នាក់ ឈ្មោះ សឿន សំណាង អាយុ៤៤ឆ្នាំ ដែលបានរងរបួស ដោយសារគ្រោះរញ្ជួយដី នៅប្រទេសថៃ តាមរយៈលោក ហេង សួរ រដ្ឋមន្ដ្រីក្រសួងការងារ ចុះទៅសួរសុខទុក្ខដល់មន្ទីរពេទ្យ។

អ្នកស្រី សឿន សំណាង បានជួបគ្រោះថ្នាក់បាក់កែងជើង ដោយសារគ្រោះរញ្ជួយដី នៅក្នុងប្រទេសថៃ កាលពីរសៀល ថ្ងៃទី២៨ ខែមីនា ឆ្នាំ២០២៥។ ប៉ុន្ដែឥឡូវ ពលការិនីរូបនេះ បានវិលត្រឡប់មកដល់ស្រុកកំណើតរបស់គាត់វិញ នៅភូមិវាលថ្នល់ ឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ កាលពីរសៀល ថ្ងៃទី៣០ ខែមីនា ឆ្នាំ២០២៥។ បច្ចុប្បន្ន អ្នកស្រី ត្រូវបានបញ្ជូនទៅសម្រាកព្យាបាល នៅមន្ទីរពេទ្យបង្អែកខេត្តកំពង់ធំ ខណៈថ្លៃព្យាបាលស្ថិតក្រោមការឧបត្ថម្ភទាំងស្រុង ពីសម្តេចធិបតី ហ៊ុន ម៉ាណែត នាយករដ្ឋមន្រ្ដីកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។

ជាមួយគ្នានេះដែរ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និង លោកស្រី ពេជ ចន្ទមុន្នី ហ៊ុនម៉ាណែត កាលពីថ្ងៃទី១ ខែមេសា ឆ្នាំ២០២៥ បានចូលបច្ច័យចំនួន១ម៉ឺនដុល្លារ ជូនដល់ក្រុមគ្រួសាររបស់ពលករខ្មែរម្នាក់ ឈ្មោះ មាស សាវ៉ាង ភេទប្រុស អាយុ២៣ឆ្នាំ ដែលបានបាត់បង់ជីវិត នៅក្នុងហេតុការណ៍គ្រោះរញ្ជួយដី នៅប្រទេសថៃ កាលពីថ្ងៃទី២៨ ខែមីនា ឆ្នាំ២០២៥ ខណៈគាត់កំពុងតែស្នាក់នៅ និង ធ្វើការ នៅប្រទេសថៃ។

បើតាមលោកឧត្ដមសេនីយ៍ មីន អ៊ោងហ្លាង (Min Aung Hlaing) មេដឹកនាំរបបយោធាមីយ៉ាន់ម៉ា បានឲ្យដឹង ​ថា បើគិតត្រឹម ថ្ងៃអង្គារ ទី១ ខែមេសា ក្រុមអ្នកជួយសង្គ្រោះ បានរកឃើញសពរបស់ជនរងគ្រោះ ជាង២៧០០នាក់ និង រងរបួស ចំនួន ៤ ៥២១នាក់ ខណៈមនុស្ស ចំនួន៤៤១នាក់ផ្សេងទៀតកំពុងតែបាត់ខ្លួន។ ដូច្នេះចំនួនអ្នកស្លាប់ អាចនឹងកើនលើសពី៣០០០នាក់។

ចំណុចកណ្ដាល នៃគ្រោះរញ្ជួយដីដ៏ខ្លាំង មានកម្រិត៧,៧រ៉ិចទ័រ កាលពីថ្ងៃសុក្រ ទី២៨ ខែមីនា ឆ្នាំ២០២៥ បានវាយប្រហារ ចំទីក្រុងម៉ាន់ដាឡៃ (Mandalay) ដែលជាទីក្រុងធំលំដាប់ទី២របស់ប្រទេសមីយ៉ាន់ម៉ា ដោយមានប្រជាជន ជាង១,៧លាននាក់រស់នៅ។ ឥទ្ធិពល នៃគ្រោះរញ្ជួយដ៏កំណាចមួយនេះ បានបន្ដវាយប្រហារទៅលើទីក្រុងបាងកករបស់ប្រទេសថៃ ធ្វើឲ្យខូចខាតដល់ហេដ្ឋារចនាសម្ព័ន្ធនានា និង បាក់រលំអគារកម្ពស់៣០ជាន់ ដោយបានសម្លាប់មនុស្សរាប់សិបនាក់ និង មានអ្នករងរបួសជាច្រើននាក់ផងដែរ៕