រាជធានីភ្នំពេញ៖ អ្នករត់តាក់ស៊ីម្នាក់ បញ្ឆេះរថយន្ដ និង បើកម៉ាស៊ីនត្រជាក់ជូនភ្ញៀវកុំឲ្យក្ដៅស្អុះ ហើយរវល់តែរត់រកចាប់ម៉ូយ ស្រាប់តែជនកំហួចម្នាក់ បានលួចបើកគេចខ្លួន បង្កឲ្យមានការភ្ញាក់ផ្អើលឡើង ជិះម៉ូតូដេញតាមចាប់ កាលពីវេលាម៉ោង១ និង៣០នាទីរសៀល ថ្ងៃទី៣១ ខែមីនា ឆ្នាំ២០២៥ នៅតាមផ្លូវជាតិលេខ៣ ត្រង់ចំណុចគល់ស្ពានអាកាសចោមចៅ ស្ថិតក្នុងភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មាន បានឲ្យដឹង ថា នៅមុនពេលកើតហេតុ មានបុរសជាអ្នករត់តាក់ស៊ីម្នាក់ បានបើករថយន្ដរបស់គាត់ ម៉ាកអេសសាំយ៉ុង ពណ៌ខៀវ ពាក់ស្លាកលេខ ភ្នំពេញ 2AK-7933 មកចត នៅចំណុចកើតហេតុ ដើម្បីរង់ចាំម៉ូតូ។ ស្របពេលរថយន្ដមិនពន្លត់ម៉ាស៊ីននោះ ស្រាប់តែជនសង័្សយម្នាក់ នៅក្នុងរថយន្ដនោះបានមើលឃើញម្ចាស់រថយន្ដ កំពុងតែរវល់រត់រកចាប់ម៉ូយ ក៏បើករថយន្ដរបស់ជនរងគ្រោះ ព្យាយាមបើកគេចខ្លួន។

បើតាមជនរងគ្រោះ បានឲ្យដឹង ថា នៅមុនពេលកើតហេតុ គាត់បានបើករថយន្ដមករកចាប់ម៉ូតូ នៅចំណុចកើតហេតុ ដោយមិនបានពន្លត់ម៉ាស៊ីនរថយន្តនោះទេ ព្រោះខ្លាចម៉ូយក្ដៅស្អុះ ហើយក្នុងចំណោមម៉ូយ២នាក់ មានជនសង័្សយម្នាក់ផងដែរ។ រីឯរូបគាត់គិតតែពីរវល់រត់រកចាប់ម៉ូយ ដាក់ឲ្យបានពេញរថយន្ដ។ លុះពេលគាត់ក្រឡេក មករករថយន្ដវិញ អត់ឃើញរថយន្ដរបស់គាត់ ទើបគាត់ជួលម៉ូតូឌុប ជិះដេញតាម រហូតដល់ត្រង់ចំណុចមុខខ្លោងទ្វារវត្តជន្លង់ម្លូ នៅតាមផ្លូវជាតិលេខ៣ ស្ថិតក្នុងភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ទើបចាប់បាន ហើយប្រជាពលរដ្ឋនៅជិតនោះ បាននាំគ្នាវាយទាត់ធាក់ ម្នាក់មួយដៃមួយជើង រហូតទ្រមខ្លួន នៅមុនពេលប្រគល់ឲ្យប៉ុស្តិ៍នគរបាលរដ្ឋបាលភ្លើងឆេះរទេះ នាំទៅចាត់ការបន្ដ។

មន្រ្ដីប៉ុស្តិ៍នគរបាលរដ្ឋបាលភ្លើងឆេះរទេះ បានឲ្យដឹង ថា ជនសង័្សយ ឈ្មោះ ជេត វណ្ណ ភេទប្រុស អាយុ៣០ឆ្នាំ មានមុខរបរជាអ្នកខ្វៃជ្រូក ស្នាក់នៅបន្ទប់ជួលភូមិថ្មគោល១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ រីឯជនរងគ្រោះ ជាម្ចាស់រថយន្ដ ឈ្មោះ ជឿន ចាន់ណាក់ អាយុ៣២ឆ្នាំ មានមុខរបរ ជាអ្នករត់តាក់ស៊ី មានទីលំនៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។

ប្រភពដដែល បានបន្ដ ថា ក្រោយពេលសាកសួររួចមក សមត្ថកិច្ចបានដឹង ថា កន្លែងកើតហេតុ មិនស្ថិតក្នុងដែនដីរបស់សង្កាត់ភ្លើងឆេះរទេះ ខណ្ឌកំបូល នោះទេ គឺកើតឡើង នៅភូមិភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ។ បន្ទាប់មក សមត្ថកិច្ចប៉ុស្ដិ៍រដ្ឋបាលសង្កាត់ភ្លើងឆេះរទេះ បានប្រគល់ជនសង័្សយ ជូនទៅប៉ុស្ដិ៍នគរបាលរដ្ឋបាលចោមចៅទី៣ ដើម្បីចាត់ការបន្ដ។ ប៉ុន្តែក្រោយមក ម្ចាស់រថយន្តមិនបានប្តឹងផ្តល់ ទៅលើជនសង័្សយ ដោយគាត់គ្រាន់តែសំណូមពរ ដល់សមត្ថកិច្ចឲ្យជួយអប់រំ និង ឲ្យជននេះធ្វើកិច្ចសន្យាបញ្ឈប់សកម្មភាពបែបនេះ នាំឲ្យមានទោសទណ្ឌដល់ខ្លួន ហើយក៏បានបញ្ចប់រឿងត្រឹមតែប៉ុណ្ណឹងទៅ៕