ម៉ូតូ២គ្រឿង បុកគ្នាជាមួយរថយន្ដ ស្លាប់-របួសជាច្រើននាក់

18 ម៉ោងមុន

រាជធានីភ្នំពេញ៖ រថយន្ដមួយគ្រឿង បានបើកបរយ៉ាងលឿន ហើយបានបុកគ្នាជាមួយនឹងអ្នកជិះម៉ូតូចំនួន២គ្រឿងយ៉ាងពេញទំហឹង បណ្ដាលឲ្យមនុស្ស២នាក់រងរបួស និង យុវជន២នាក់ផ្សេងទៀត បានស្លាប់ភ្លាមៗ នៅនឹងកន្លែងកើតហេតុ កាលពីវេលាម៉ោង៩ និង ៣០នាទីយប់ ថ្ងៃតី២៥ ខែធ្នូ ឆ្នាំ២០២៤ នៅមុខក្បែរផ្សារគ្លូបល តាមផ្លូវលេខ៩២ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ប្រភពព័ត៌មាន បានឲ្យដឹង ថា នៅមុនពេលកើតហេតុគ្រោះថ្នាក់ចរាចរណ៍ដ៏រន្ធត់នោះ មានបុរសម្នាក់បានបើករថយន្ដឡិចស៊ីស RX330 ពណ៌ស ពាក់ស្លាកលេខ ភ្នំពេញ 2AP-2098 តាមបណ្ដោយផ្លូវលេខ៩២យ៉ាងលឿន។ លុះពេលគាត់បានបើករថយន្ដ មកដល់ចំណុចកើតហេតុ ស្រាប់តែបុកគ្នាជាមួយម៉ូតូចំនួន២គ្រឿង ដួលបោកទៅលើថ្នល់ បែកក្បាលហូរឈាមពេញផ្លូវ បណ្ដាលឲ្យមនុស្ស២នាក់បាត់បង់ជីវិតយ៉ាងអាណោចអាធ័មមួយរំពេច និង ២នាក់ផ្សេងទៀត រងរបួស ដោយក្នុងនោះមានយុវជនម្នាក់បានរងរបួសបាក់ជើងម្ខាង និង ម្នាក់ទៀត បានរងរបួសស្រាល។

ក្រោយពេលកើតហេតុភ្លាមៗនោះ ប្រជាពលរដ្ឋបានឃាត់ខ្លួនអ្នកបើកបររថយន្ដ ប្រគល់ជូនទៅសមត្ថកិច្ច។ បន្ទាប់មក មន្រ្ដីនគរបាលចរាចរណ៍ បានចុះមកពិនិត្យ និង វាស់វែង ហើយដកហូតយានយន្ដទាំង៣គ្រឿង យកទៅរក្សាទុក ដើម្បីរង់ចាំដោះស្រាយ តាមច្បាប់។ ដោយឡែក សពរបស់ជនរងគ្រោះ ត្រូវបានសមត្ថកិច្ចប្រគល់ជូន ក្រុមគ្រួសារដឹកយកទៅធ្វើបុណ្យតាមប្រពៃណី៕