ពិព័រណ៍ឧស្សាហកម្មសំណង់កម្ពុជា-អន្តរជាតិ ឆ្នាំ២០២៤ ដែលមាន​ការដាក់​តាំង​បង្ហាញ​លក់​សម្ភារ​​បរិក្ខា ឧបករណ៍ និងគ្រឿងចក្រសំណង់គ្រប់ប្រភេទ ព្រមទាំងមានអចលទ្រព្យ ធនាគារ និង​សេវាកម្មជាច្រើនទៀត បានប្រកាសបើកសម្ពោធជាផ្លូវការនៅព្រឹកថ្ងៃទី៥ ខែធ្នូនេះ ក្រោម​អធិបតី​ភាព ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និង​សំណង់ និងមានការចូលរួមពីភ្ញៀវពីកិត្តិយសជាច្រើនរូប នៅមជ្ឈមណ្ឌលពិព័រណ៍កោះពេជ្រ។

លោក​អ្នក​ឧកញ៉ាបណ្ឌិត ពុង ឃាវសែ ប្រធានសមាគមអ្នកសាងសង់កម្ពុជា បាន​មាន​ប្រសាសន៍​ឲ្យ​ដឹង​ថា រហូតមកដល់ពេលនេះ គឺជាឆ្នាំទី១៤ហើយ ដែលសមាគម​បាន​រៀបចំ​សន្និបាត​បូក​សរុប​ការងារ​ប្រចាំ​ឆ្នាំរបស់សមាគម ហើយក៏ជាលើកទី១២ នៃការរៀបចំកម្ម​វិធីតាំង​ពិព័រណ៍​ឧស្សាហកម្ម សំណង់កម្ពុជា-អន្តរជាតិ ដែលមានលក្ខណៈលំដាប់អន្តរជាតិ និងធំជាងគេ​នៅ​ប្រទេស​កម្ពុជា​។

លោកអ្នកឧកញ៉ាបណ្ឌិត បានបញ្ជាក់ថា គោលបំណងចម្បងនៃការរៀបចំកម្មវិធីតាំងពិព័រណ៍នេះ គឺ​ដើម្បីផ្តល់ឱកាសឱ្យក្រុមហ៊ុនទាំងប្រទេស និងក្រៅប្រទេសដែលជាម្ចាស់រោងចក្រ ឬជា​អ្នក​នាំ​ចូល​សម្ភារៈ បរិក្ខារ និងគ្រឿងចក្រ សំណង់នីមួយៗ អាចចូលរួមដាក់​តាំង​បង្ហាញ​ផលិត​ផល​របស់​ខ្លួន​ជា​រៀង​រាល់ឆ្នាំ និងអាចធ្វើការផ្គត់ផ្គង់ទៅតាមតម្រូវការទីផ្សារខាងវិស័យសំណង់នៅកម្ពុជា ជា​ពិសេសបង្កើតជាវេទិកាឲ្យអ្នកទិញ អ្នកលក់ ម្ចាស់រោងចក្រ បានជួប និងស្វែងយល់គ្នាដោយផ្ទាល់ ថែម​ទាំង​អាចជម្រុញឲ្យមានការ សហការគ្នាជាដៃគូររវាងគូភាគី ដើម្បីទទួលបាននូវតម្លៃ និង​លក្ខ​ខណ្ឌ​ទូទាត់​ពិសេសៗ ពីដៃគូរ អាជីវកម្ម។

នៅក្នុងពិធីបើក​សម្ពោធពិព័រណ៍នេះ ឯកឧត្តម ឧបនាយករដ្ឋមន្ត្រី សាយ សំអាល់ បានមាន​ប្រសាសន៍​ថា ផ្តើមចេញពីពិព័រណ៍នេះ ត្រូវរួមគ្នាកសាងនូវឧស្សាហកម្មអចលនទ្រព្យ ឧស្សាហកម្ម​គ្រឿង​បង្គុំសំណង់ ឧស្សាហកម្មគ្រឿងតុបតែង និងឧស្សាហកម្មធនាគារ ដើម្បី​ឧត្តម​ប្រយោជ​ន៍ប្រជាជន និងប្រទេសជាតិកម្ពុជា។

ឯកឧត្តមឧបនាយករដ្ឋមន្រ្តី បានលើកឡើងបន្ត ការជួបើជុំគ្នានាពេលនេះ គឺជាឱកាសដ៏ល្អប្រសើរ ដើម្បី​ជជែកពិភាក្សារកវិធីសាស្ត្រ ធ្វើយ៉ាងណា​ឱ្យ​ការងារ​ដែល​អ្នក​ទាំង​អស់​គ្នា​កំពុង​ធ្វើ​ទទួល​បាន​ប្រ​សិទ្ធ​​ភាពខ្ពស់ ធ្វើឱ្យឧស្សាហកម្មសំណង់ និងអចលនទ្រព្យកាន់ល្អប្រសើរឡើងបន្ថែមទៀត ជា​ពិសេស​ការសាងសង់លំនៅដ្ឋានជូនប្រជាពលរដ្ឋក្នុងតម្លៃសមរម្យ។ ដោយឡែក វិស័យធនាគារ សូម​ផ្តល់អត្រាការប្រាក់ក្នុងតម្លៃទាប ដើម្បីឲ្យប្រជាពលរដ្ឋ​មាន​លទ្ធភាព​ទិញ​លំនៅដ្ឋាន​ដើម្បី​រស់នៅ​ស​មរម្យ ខណៈប្រមុខរាជរដ្ឋាភិបាលកម្ពុជា ក៏បានផ្តល់គោលការណ៍លើកទឹកចិត្តពន្ធដារ ក្នុង​វិស័យអចលនទ្រព្យ ដើម្បីកាត់បន្ថយបន្ទុកក្នុងការចំណាយបង់ពន្ធ ដល់​អ្នក​អភិវ​ឌ្ឍ​អចលន​ទ្រព្យ ​និងប្រជាពលរដ្ឋជាម្ចាស់អចលនទ្រព្យ។

ពិព័រណ៍​ឧស្សាហកម្មសំណង់កម្ពុជា-អន្តរជាតិ ឆ្នាំ២០២៤ លើកទី១២នេះ មាន​ក្រុម​ហ៊ុន​ចូល​រួម​ចំនួន​ ១១២ក្រុមហ៊ុន ស្មើនឹង ២៣៧ស្តង់ និងមានសម្ភារៈបរិក្ខារ ឧបករណ៍ គ្រឿង​ចក្រ​សំណង់​ផលិត​នៅ​ក្នុង​ស្រុក និងនាំចូលមកពីបណ្តាប្រទេសជាច្រើនសរុបប្រមាណជាង ៥០០ប្រភេទ រួម​ទាំង​សេវា​កម្មផ្សេងៗជាង៥០ប្រភេទ ដែលពាក់ព័ន្ធនឹងវិស័យសំណង់ មកដាក់តាំង​បង្ហាញ​ក្នុង​កម្ម​វិធី​ពិព័រណ៍​នា​ពេលនេះ៕