រដ្ឋធានីប៉េកាំង៖ ព្រះសង្ឃមហាយានសៅលីន(Shaolin)របស់ប្រទេសចិន មួយអង្គ ដែលកំពុងតែល្បីល្បាញបំផុត និង ធ្លាប់មកសម្ដែងក្បាច់គុនមិត្តភាពជាមួយអ្នកលេងក្បាច់គុនល្បុក្កតោនៅក្នុងព្រឹត្តិការណ៍ពិព័រណ៍វប្បធម៌ទេសចរណ៍ នៅលើទឹកដីអង្គរ នាខេត្តសៀមរាប កាលពីថ្ងៃទី២៤ ខែមេសា ឆ្នាំ២០២៤ បានសុគត ទាំងមានជន្មាយុនៅក្មេងខ្ចី ហើយពិតជាគួរឲ្យសោកស្ដាយអំពីទេពកោសល្យរបស់ព្រះអង្គជាទីបំផុត។

បើតាមប្រព័ន្ធផ្សព្វផ្សាយរបស់ចិន បានរាយការណ៍ព្រោងព្រាត កាលពីថ្ងៃសុក្រ ទី៩ ខែសីហា ឆ្នាំ២០២៤ ថា ព្រះតេជគុណ គីវ ហ្វែង (Qiu Feng) ជាព្រះសង្ឃសៅលីន (Shaolin) របស់ប្រទេសចិន មានភាពល្បីល្បាញ ជាមួយនឹងរូបរាងដ៏សង្ហាបំផុត និង មានទេពកោសល្យខាងក្បាច់គុនសៅលីន។

បើតាមសេចក្ដីការណ៍ន ពីបណ្ដាញផ្សព្វផ្សាយនានា កាលពីនៅថ្ងៃសុក្រ ទី៩ ខែសីហា ឆ្នាំ២០២៤ ដោយបានដកស្រង់ប្រភព ពីព្រះសង្ឃសៅលីន ដែលជាអ្នកជិតស្និទ្ធរបស់ព្រះអង្គ បានបញ្ជាក់ ថា ព្រះតេជគុណ Qiu Feng បានបើករថយន្ដ កាលពីព្រឹកព្រលឹម ថ្ងៃទី៧ ខែសីហា តែជាជាអកុសល រថយន្ដរបស់ព្រះអង្គ បានបុកគូទរថយន្ដដឹកទំនិញធុនធំមួយគ្រឿង នៅតាមផ្លូវហ្ស៊ូយ៉ុង អេសប្រែសស្វេ ( Zhuyong Expressway) នៅក្នុងទិសដៅឆ្ពោះទៅកាន់ទីក្រុងវែនហ្ស៊ូ (Wenzhou) ខេត្តហ្សេជាង (Zhejiang) ប្រទេសចិន។ នៅក្នុងឧប្បត្ដិហេតុគ្រោះថ្នាក់ចរាចរណ៍ បានបណ្ដាលឲ្យព្រះអង្គរងរបួសធ្ងន់ ហើយត្រូវបានគេបញ្ជូនទៅសង្គ្រោះ នៅក្នុងមន្ទីរពេទ្យ។ ប៉ុន្ដែដោយសារតែស្ថានភាពរបួសធ្ងន់ធ្ងរពេក ទើបក្រុមគ្រួពេទ្យជំនាញ មិនអាចជួយសង្គ្រោះជីវិតរបស់ព្រះអង្គបាន ហើយព្រះអង្គ ក៏បានសុគត នៅវេលាម៉ោងប្រហែល១២ និង ៥៣នាទីរំលងអធ្រាត្រ ឈានចូលថ្ងៃទី៨ ខែសីហា ឆ្នាំ២០២៤។

ព្រះសង្ឃមហាយានចិនអង្គនេះ មានភាពល្បីល្បាញយ៉ាងខ្លាំង ដោយសារតែព្រះអង្គ មានរូបរាងយ៉ាងសង្ហា ហើយមានឈ្មោះបោះសំឡេងយ៉ាងខ្លាំង នៅក្នុងរឿងភាគទូរទស្សន៍«Go to Mountains and Seas» កាលពីអំឡុងឆ្នាំ ២០២៤ ហើយព្រះអង្គក៏បានដើរតួ នៅក្នុងរឿង«Autumn Wind» ផងដែរ។ ឈ្មោះរបស់ព្រះតេជគុណ Qiu Feng គឺ Shi Yanheng (ស៊ី យ៉ានហេង) ជាព្រះសង្ឃមហាយានជំនាន់ទី៣៤ នៃប្រាសាទសង្ឃសៅលីន (Shaolin) របស់ប្រទេសចិន។

ព្រះតេជគុណអង្គនេះ មានភាពល្បីល្បាញខ្លាំង ដោយសារតែរូបរាងយ៉ាងសង្ហា ហើយមានភាពរហ័សរហួន នៅក្នុងសម្ដែង ឬ បង្ហាញក្បាច់គុនសៅលីន។ បើតាមគណនីផ្ទាល់ខ្លួនរបស់ព្រះតេជគុណអង្គនេះ មានអ្នកគាំទ្រ រហូតដល់រាប់លាននាក់ នៅលើប្រព័ន្ធផ្សព្វផ្សាយសង្គមល្បីៗ។ ព្រះតេជគុណ គីវ ហ្វេង ( Qiu Feng) ធ្លាប់មកចូលរួមសម្តែងក្បាច់គុនសៅលីនចិន ជាមិត្តភាពជាមួយនឹងគុនល្បុក្កតោរបស់ខ្មែរ កាលពីថ្ងៃទី២៤ ខែមេសា ឆ្នាំ២០២៤ នៅក្នុងព្រឹត្តិការណ៍ពិព័រណ៍វប្បធម៌ទេសចរណ៍ នៅលើទឹកដីអង្គរ នាខេត្តសៀមរាប ព្រះរាជាណាចក្រកម្ពុជា ផងដែរ៕