រាជធានីភ្នំពេញ៖ បុរសជនជាតិចិនម្នាក់ ទើបនឹងចេញពីផឹកស្រវឹង បានបើករថយន្ដយ៉ាងលឿន ជ្រុលចង្កូតទៅបុករះរថយន្ដធុនតូចមួយគ្រឿង និង បន្ដទៅបុកម៉ូតូ អូសទាំងម៉ូតូ និង មនុស្ស នៅជាប់ពីក្រោមរថយន្ដ ខណៈរថយន្ដបង្ក បានបន្ដទៅបុកបង្គោលភ្លើងមួយដើមបន្ថែមទៀត ទើបទៅមុខលែងរួច ធ្វើឲ្យមនុស្សម្នាភ្ញាក់ផ្អើលឡើង កាលពីវេលាល្ងាច ថ្ងៃទី២ ខែសីហា ឆ្នាំ២០២៤ នៅតាមផ្លូវជាតិលេខ៤ ជិតវត្ដជម្ពូវ័ន ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មាន បានឲ្យដឹង ថា នៅមុនពេលកើតហេតុ មានបុរសជាជនជាតិចិនម្នាក់ បានបើករថយន្ដ ម៉ាកហ៊ីយ៉ាន់ដាយ ស្ដារិក ពាក់ស្លាកលេខ ភ្នំពេញ 2N-5066 បោះពួយយ៉ាងលឿន តាមបណ្ដោយផ្លូវជាតិលេខ៤។ លុះពេលគាត់បានបើករថយន្ដ មកដល់ចំណុចកើតហេតុ ទំនងជាអ្នកបើកបរស្រវឹងផង គួរផ្សំនឹងរថយន្ដមានល្បឿនលឿនផង ទើបមិនអាចគ្រប់គ្រងដៃចង្កូតបាន ធ្វើឲ្យរថយន្ដរេចង្កូតទៅបុករថយន្ដធុនតូចមួយគ្រឿង ម៉ាកម័រនីង ពាក់ស្លាកលេខ ភ្នំពេញ 2AX-8942 និង បន្ដទៅបុកម៉ូតូចំនួនមួយគ្រឿងទៀត អូសទាំងមនុស្សចំនួន២នាក់ និង ម៉ូតូ ជាប់នៅពីក្រោមរថយន្ដបង្ក ដោយបានបណ្ដាលឲ្យមនុស្សជាច្រើននាក់រងរបួសធ្ងន់ស្រាល ហើយរថយន្ដបង្កបន្ដទៅបុកបង្គោលភ្លើងមួយដើមទៀត ទើបទៅមុខលែងរួច ខណៈបង្គោលភ្លើង មិនរលំ។ រីឯរថយន្ដ និង ម៉ូតូបានរងការខូចខាតយ៉ាងដំណំ។

ក្រោយពេលកើតហេតុ សមត្ថកិច្ចបានចុះទៅពិនិត្យ និង វាស់វែង រួចហើយធ្វើកំណត់ហេតុ ដកហូតយានយន្ដពាក់ព័ន្ធ នាំទៅចាត់ការតាមច្បាប់។ ដោយឡែក អ្នករងរបួស ត្រូវបានបញ្ជូនទៅកាន់មន្ទីរពេទ្យ៕